Da ka FUTSAL yow lait ki khynnah u ngat ha ki drugs

Jowai : I pynemkaam drugs man i iwa joor kat dang lai ki sngi wei ha ini da ngat da ki spah da ki hajar ngut ki wa chynrang wa kynthai, khynnah wa ki waheh.

Kamtæ kam chibynta wow yada wei wow yarap ya ki khynnah u kiar na ini i kaam, ka Anti Narcotics Cell, Jowai da jooh pynman ko da kiwa boon ki program, wei ha kani ka kynti u pynman noh da ka FUTSAL hajrong ka phang “POSITIVE ADDICTION CAMPAIGN”.

Ka thong toh wow riñ ya ki khynnah kiwa dang khai khynroo cha ka yalehke sports wa ha rukom, wei ha kani ka kynti toh wow pynpsiah biang ya i mynsien ka-it ya ka yalehke football.

Ya ka FUTSAL (mar saan ngut chilliang) da sdang na Montevedeo, Uruguay ha ki snem 1930, wei da bna naam bha ko ha chnong Brazil khamtam ki Favelas (Ki thaw wa joor bha i dih drugs ha Brazil). Toh leh lyngba ka FUTSAL wa da mih ki khloor yalehke football kam u Ronaldinho.

Related posts

Deilang ki yakob rwai wei chaad ha ka yakhun Final ka 1st War Jaiñtia Invitational Football Tournament

May 11, 2025

Poi noh ka Baby League ka East Jaiñtia cha wakut

May 10, 2025

Ka thong wow pynman ya kam kani ka lympung ha Jowai toh wow pynmih ya u khloor kam u Ronaldinho na Jowai wei wow yarap ya ki khynnah khynroo yow lait ki u ngat na ki drugs.

Ha kani ka lympung yalehke football da yooluti wow wan chimbynta ki chnong wa ki dong waphær waphær ka Jowai kamjooh ki chnong wa najan ka Jowai heiwa kawi ka dhab u em ko 10 ngut kiwa yalehke ki wow kynthup ya 4 ngut kiwa hapoh 14 snem i rta katwa kiwa tam won ye ki u em hapyrdi 15-25 snem i rta.

Ya ki yakhun u pynyaleh da ka Knock Out neibhah kani ka lympung toh kawa du ar namo le sngi hi-eh.

Ha kani ka lympung lait na ki yalehke football wa kiwi kiwi daw em leh ki dukan dai baam, i pynyoo kari thymme, ki games corner, ki rwai ki siaw wa kiwi kiwi.

Ya kiwa jop u e da ka song poisa wa ki trophy, u Best Player u yoh u ya ki gift coupon na ki Brand kam ka NIKE/ADIDAS/REEBOK/PUMA, u Promising Player u yoh u wow psiah wow chah esikai ha ka Grassroots Program ka 7 Wasa Football Club i wow kynthup ya i lai skur mynkna hadooh class X ha North Liberty Higher Secondary School, Jowai.

Waroh ki chnong wa ki dong kiwa yachimbynta daw e ya ki da ki Certificate of Participation, wei da kyntu ya waroh wow yawan cha kani ka lympung yow pynman ya ka thong kawa jop.