Kam chibynta wow yarap ya ki bru kiwa da sahkut hadien wa chlai um ha South Garo Hills da wan yarap ka Indian Air Force wow kit ya ki mar yarap cha ki spah tylli ki manyung khamtam kiwa em ha ka thaaiñ Siju-Maheskola ynne ka sngi tangwa da hap wow uiñdien neidaw wym chah ka suiñ bneiñ.
Ya ki marbaam nadooh u khoo, ki baam dih-cha, i phñiang baam, ki kymmor wa kiwi de da kit da ki Truck yow li booh cha Shillong Air Force Station wei da kit won da ki Helicopter ka Indian Air Force kawa wan na Guwahati.
Tangwa neidaw wa joor u lyoh ym ye u poi cha Maheskola wei da hap wow dong noh wei daw pyrchang biang wow leh yeini mynstep ka sngi.
U Montri Rangbah ka jylla, u Conrad Sangma leh da thmu u wow lai da ka Helicopter cha South Garo Hills yow yachem wa kiwa chah ktah tangwa da hap u wow lai da ka sarok neidaw wa sih ka suiñ bneiñ.
Ya kini ki marbaam wa da thmu wow li e da ka Helicopter toh kiwa da dep song kyrpang ya ka chnong Mahadeo, Kanai, Bonbera, Rongsu Agal wa Kalu Songmong. Ka Helicopter toh kawa da thmu wow hiar ha madan Siju wa Maheskola yow saam ya kini ki mar yarap.
Ha ka thaaiñ Siju-Maheshkola-Mahadeo da em palat 300 tylli ki manyung kiwa da sahkut nadooh ka 17 tarik hadien wym lait de u lai luti lyngba ka Rongara wa Ranikor na South West Khasi Hills wa da sahkut neidaw wa oor khyndaw.
I metyap ki 6 ngut ki bru wa da chah ban hei oor khyndaw da chem wei ar ngut dang wiar ha thaaiñ Nangalbibra ka South Garo Hills.
