U Montri ka chnat Tourism, u Sniawbhalang Dhar deilang wa u Montri ka chnat C&RD, u Hamlet Dohling, u MLA ka 2-Jowai Constituency, u Wailadmiki Shylla, u CEM ka JHADC, u Thombor Shiwat wa u MDC ka Mukhla-Wahiajer u Ailad Bhoi wa kiwi de da booh ki ya u mooyurim ka Hospitality Complex kawa daw chna ha rood ka nan Thadlaskein hei dor wa T. 35 klur kam chibynta ka bynta wa nyngkong namo ka Phase-I ynne ka sngi.
U Sniawbhalang hawa e yei klam da ong u wa ha kani ka Hospitality Complex toh ka wow pynku ya ki kaam uiñke suwari yow pyman ya ka Thadlaskeiñ kam kawa em hapyrdi nadooh ki thaw sah, ka thaw chim kari wa kiwi de yow lai cha ki thaw uiñke suwari wa em ha ri-loom Jaiñtia.
Ha kani ka Hospitality Complex daw chna 5 tylli ki Resort, ka Amphitheatre, ka Convention Hall neibynta 500 ngut ki bru, ka Banquet Hall ar tylli neibynta mar 200 ngut kawi, ki kamra sah namo ki Hotel Room wa 30 tylli, ki dukan 32 tylli, ka thaw yalehke ki khynnah, ki Tree House, ki Spa, ki thaw sah wa kyrpang wa syad dor wa kiwi kiwi de wei kini waroh daw chna hei thaw wa heh 2,14,935.55 Sqft iwa kynthup lang yei thaw ka chnat Fishery iwa em nakhmat i thaw psiah cha Thadlaskein wa i thaw wa e da ka Raij Mukhla iwa nadien ka nan Thadlaskein ki wow em ki Resort.
U Sniawbhalang da ong u kani ka thaw daw e kreh ko ya 200 hadooh 250 ngut nadooh kiwa emkti ha ki kaam dai baam, ki thaw sah, ki kaam khawai, kiwa kamai kari wa kiwi kiwi de kiwa yatoh wa ki kaam uiñke suwari.
Da ong u leh wa nachwa hawa ong ki thaw wa da chna daka sorkar kiwa yatoh wa ki kaam Tourism da man bait ki kam ki yung ksuid kiwa da ieh khlem da sumaar tangwa katni kat chawa lai khamtam ha thaaiñ Sohra sa du ki Homestay kiwa da yarap ka sorkar ya ki bru wow sdang deiwa e Subsidy.
“Chwa u 2018 ka sorkar da pynlut ko iwa heh dooh T. 15 klur tangwa katni da khut Tender yow chna ya ki thaw kiwa da chongdor da hajar klur tyngka yow pynku ya ka kaam uiñke suwari,” da ong u Sniawbhalang.
Da ong u wa kani ka Thadlaskein Hospitality Complex toh kawa T. 36 klur du ka Phase-I wei daw lut chooh chooh manda pyndait pynbiang ya kiwa emkaam u booh hapoh kani ka thaw.
Da e nongmuna u ya kiwi ki thaw wa em cha baar ri kiwa kamai da ki klur tyngka chi sngi na kiwa wan uiñke suwari kamtæ da ong u wa i leh toh em ka thong wow ye wow poi kam ki.
Da wan wow sakhi leh ya ini da u Director ka Tourism Department, u C.V. Diengdoh, IAS, u Director ka C&RD Department, u SC Sadhu, IAS, u Deputy Commissioner ka West Jaiñtia Hills, u B.S. Sohliya, IAS wa kiwi kiwi de.
