Ka chnong Jowai chirup deilang ka ri waroh kawi da lehkmen ko ya ka 79th Independence Day ha madan Jrisaleiñ heiwa u Montri ka chnat Revenue & Disaster, u Kyrmen Shylla da wan pynhær u ya ka lama ka ri wei da chim u leh ya ka Rastriya Salute neibynta ki 33 tylli ki dhab wa chimbynta ha ka March Past wa kynthup ya ki District Police Jowai, ka Kiang Nangbah Govt. College SDSW, NCC Cadets, ka 61 Meghlaya Girls Battalion JW Government Girls, ka 42 Meghalaya Battalion JDJW NCC, Jowai, ka Meghalaya Bharat Scout, West Jaintia Hills District, ka Meghalaya Bharat Guide, West Jaintia Hills District deilang wa 27 tylli ki skur.
Yei naam jop da jop da yoh ka Police Public Secondary School, Jowai, hei wa ar da yoh ka PM SHRI School JNV Mukhla, katwa hei wa le da yoh ka St. Mary Mazzarello Higher Secondary School, Jowai.
Da pynkup burom leh ya ki Empanelled Health Care Service Providers hapoh ka West Jaiñtia Hills District yei pynkrehkaam bha ki ya ka MHIS- PMJAY Phase-6 nadooh ka 1 tarik u January hadooh 30 tarik u June, 2025, heiwa ka Nartiang PHC da yoh ko hapoh ka PHC Category, ka Ummulong CHC hapoh ka CHC Category, ka Jowai Civil Hospital ha ka District Hospital Category ha Jaiñtia Hills wa ka Woodland WK Hospital hapoh ka Private Hospital Category.
Da pynkup burom leh ya ki khynnah wa jop ha ka District Olympiad wa da pynman hajrong ka Mathematics, Science wa Knowledge heiwa da yoh nyngkong ka North Liberty Higher Secondary School wei da e ya ki da ka Interactive Panel, ka Q C Springside Higher Secondary School da yoh ko wa ar ko wei da e ya ki da ki Computer Set katwa ka Jowai Public School kawa yoh wa le da e cha ka da ka Meeting Room Projector.
Kam wow kdaw heini wa u Deputy Commissioner ka West Jaiñtia Hills District da pynman u ya kani ka District Level Olympiad hajrong ka Mathematics, Science wa General Knowledge ha ka 8 tarik uni u bnai ha Government Boys Higher Secondary School, Jowai deiwa chimbynta ki 16 tylli ki Secondary School na kylleiñ ka District.
Ha kani ka lehkmen da yoh leh ki rwai ki chaad kiwa da pynchit ya kani ka sngi.
Ha Hima Shangpung Laskein C&RD Block da lehkmen ya kani ka sngi laitlooid ka ri ha madan Hula wa em ha Moosyiem, Shangpung heiwa ka Santa Mary Shylla, MLA da wan ko wow pynhær ya ka lama ka ri wei da chim ko leh ya ka Rastriya Salute neibynta ki 20 tylli ki dhab wa chimbynta ha ka March Past.
Ka sur wa jop toh ka Shangpung Presbyterian Higher Secondary School, hei wa ar ka Khliehmuchut Presbyterian Upper Primary School wei hei wa le da yoh ka Dolini Chullet Memorial Secondary School.
Discussion about this post