Ha ka thong wow wanrah i yajooh yajan wei sñiaw yaman iwi ya iwi wei wow wanrah yei krehlang ka Rotary of International, ka Rotary Club Jowai ha ka 28 tarik uni u bnai da pynman ko ka yachemlang wa kyrpang ya ki para Rotarian na ka Rotary Club Mahanagar RID-3282 Sylhet yong ka ri Bangladesh.
Ya kani ka yachemlang da pynman ha Orchid Inn Thadlaskein heiwa da emlang leh ka Chatered President Rotary Club Jowai ka Rtn. E.F.Gatphoh wei ha ka yalang ya pynlai da u Rtn. Samehi Laloo, President Rotary Club Jowai, kam ka da ki ya burom kylliang hapyrdi ki para Rotarian da rwai yei sur National Anthem yong ka Ri India wa ka Ri Bangladesh hadien neitae pynbood ki kyntien pdiang burom da u Rtn. Rudolf E.Laloo.
Ha ka thong yong kani ka yachemlang u Rtn. S.K.Lato, (MPHF) Director Community Service hawa klam da ñiawtang u yei parom chaphang i yatoh yajan hapyrdi ka Ri Jaiñtia wa ka Ri Bangladesh ha ki por i synchaar yong ki Syiem Jaiñtia wei chooh chooh da ong u leh kamwa i thmu yong kani ka program toh u wanrah i rukom krehkaam wa yajan wa khooid neibynta i miat i bha yonglang i por khut ko wa datoh noh wow chongpyrkhat ya ki kaam wa yatoh wei miat i bha ka imlang sahlang khnang wa kani ka yachemlang kamni u man ko kawa soohthied na ki por cha ki por.
U Rtn. Sayed Ashraf, Adviser Rotary Club Mahnagar-Sylhet hawa e kyntien da yaroh u ya ka Rotary Club Jowai kamjooh ya ki dkhot yong ka waroh kiwa da pdiang sñiawbha yeini i wan yoohkjat yongki hapoh ka chnong Jowai wei da pynchiap u leh wow ong, emkam bha wow thoohlaad u leh yeiwoniwon iwa miat wabha neibynta kiwa boon ki kaam yonglang yongbi kiwa ye u man heidur yong i rong chisngi næ ha kiwi kiwi ki rukom kiwa pynsah naam sah kynmoo hapyrdi ka Rotary Club Jowai wa ka Rotary Club Mahnagar-Sylhet yong ka ri Bangladesh.
Khaddooh ya kani ka program da pynkut deiwa yoh ki kyntien sñiawngooh na u Rtn. J.M.Pohsngap.
