Ki heh ka BJP na Ri Bhoi kiwa da jooh dawa wow pynhiar chuki ya u President ka Party, u Ernest Mawrie katni da yoh mynsien ki hadien wa da pynhiar chuki ya u President ka Party na Uttarakhand ha ka 12 Wisu 2021.
Da ong ki wa lada ya u President ka Party BJP ha Uttarakhand da pynhiar chuki ya oo chwa wow man ka Election MLA, ya u Mawrie leh toh u pynhiar chuki noh kamwa da dawa ki heh ka Party kiwa kynthup ya ki MLA wa ki dkhot yong ka.
Da ong ki leh wa i ksoh u Mawrie kam u President ka Party wei i jop ka Congress hadooh 12 Seat ha ka Election MDC ka GHADC ym man i iwa miat neibynta ka Election MLA ka jylla ha u 2023.
Chooh chooh da chim ki leh ya i rai wow sdang noh da ka Joint Committee wow dawa pynhiar ya u Mawrie neibhah wa i kreh yong oo da yarap i ya ka Congress wow ku ko hapoh ka jylla. Deiwa kyntu leh ya ki wakreh ka Party wa ki dkhot ka NEDA wow khana cha ki heh ka Party ha Delhi heiyatoh i pynbaad u Mawrie yaka sorkar MDA iwa da yarap kylla yaka Congress ha Meghalaya wow jop ko.
Kamtæ da pyntip wa daw sdang da ka Joint Committee wow dawa pynhiar chuki noh ya u Mawrie kawa daw em dkhot da kiwa yahkhmat warim ka Party wa ki wakreh ka Party. Kani ka Committee daw sdang ko leh ya ka Online Campaign wow klam ya ki kaam u Mawrie ya iwa daw phah cha u Montri Rangbahdooh ka ri wa cha ki khlieh ka Party kiwa ha Delhi hadien ka 2 Naisan 2021.
Heijooh i por da kdaw ki leh wa u Mawrie da kyntait Ticket u ya ki kyrtong kiwa jop ha ka Election MDC ka GHADC iwa pynyoo yei leh embor u samen.
Khaddooh kini ki heh ka Party na Ri Bhoi da ong ki wa daw pynmih pyrthai ki leh yei chah pynkohngooh u Mawrie ya u Treasurer yong ka Party u Sarwan Jhunjhunwala uwa da leh yeini yow myntoi samen u.
