Ka Chief Minister’s Youth Centre (CMYC) wa em ha Shangpung da lehkmen ko ya ka Exhibition Day ynnin ka sngi yow pynyoo rong ya ki khih ki khan wa ki kaam wa da pynkreh ki heiwa da em 200 ngut kiwa da wan sakhi deilang wa kiwa yahkhmat chnong.
U Skill Development Officer, West Jaiñtia Hills District, u Lambormi Suchen da man u kam u kongsan uwa da klam chaphang ki jait kreh wa em wa ki laad seiñ khih ha kini ki por deiwa ong leh wa sñiawkmen u wow yoo ya ki khon khynroo khyllood kiwa da pynyoo yei ka-it mynsien wow wan chakhmat yow tip yeiwa thymme ha kani ka CMYC heiwa kiwa em sap leh da yoh rynsan ki wow pynpliah.
Da ong u leh wa ki mar thaiñ wa da pynyoo ha kani ka sngi toh kiwa miat bha i rukom chna wei deiwa man ki leh kam chibynta ka dustur riti daw ye dor bha wei em leh boon kiwa kwah u thied ki. “Iwi pa iwi ini i mar thaiñ toh iwa ye u dai hei dor wa T. 1500 iwi,” da ong u.
Ha kani ka sngi da yoh leh wow pynyoo paidbah ya ka kor choh kba (Husk-remover Machine) wa da chna da u Nicky Padong wa u Deiwamut Lapasam. Kani ka kor toh kawa jrong hadooh 5 phut kawa em leh boon ki tiar ki tar wei da pyndait lang deilang wa u Conveyor Belt yow rap ya u kba.
U Nicky Padong da ong u wa i rai ki wow chna ya kani ka kor toh neidaw wa kiwa chong chnong toh kiwa rep suda wei kani ka kor daw yarap ko wow pynduna yei lut phut kamjooh i bor bru. Neiliang kiwa chong chnong nadooh u waheh chnong da yaroh ki ya kani ka kor deiwa ong wa man ko kawa emkaam bha u em ha kani ka thaaiñ. Kini ki arngut chi lok da chna ki leh ya kiwi de ki tiar kam ka Fan kawa pynemkaam da i bor ka sngi wa kiwi de ki tiar ki wym ktah ya ka rymaw.
Da em leh kiwa chet baam kiwa man leh ki khynnah wa dang lai skur kiwa da pynyoo ya kiwa boon kiwa da chet ki kam ki Cup Cake wa da chna na ki mar rep kam na u saru wa thung hi ha kani ka thaaiñ. Da chet ki leh ya u chow wa da chna na u khoo iwa da yoh yaroh bha na ki paidbah.
Ka Wisstar Sungoh kawa man kam kawa soor that kaw da sikai pyn da ka ya ka hi, da yoh yaroh bha ko ya ki riam wa da soor ko kiwa miat bha wei kiwa yoo sy’at dor.
Kani ka Exhibition Day man ko leh kam wow pynkut ya i e sikai hapoh ki CMYC kawa da pynman 3 bnai wei kani ka sngi man ko leh kam wow pynyoo ya u soh wa da mih wei ya ki paidbah leh yow yoh ki wow yoo yei sap ki khon khynroo khyllood ka chnong.
Hapoh ka jylla em 22 tylli ki CMYC wei na kini da em kawi ha Shangoung wa kawi won ha Pasyih, West Jaintia Hills.
