Ka Waikhyrwi Sports Club & Social Organisation Dkhiah West kawa pynman yaka 1st Waikhyrwi Festival 2022 kawa daw pynman ha kani ka 13 wa 14 tarik ha Teilang Playground Dkhiah West, East Jaiñtia Hills, da pyntip ko wa haka 10 tarik uni u bnai kam chibynta kani ka tamasa daw pynman daka Trekking kawa daw sdang na Dkhiah West (Moowakhu) chadooh Moopala ka Thwai Syiem Lidakha wei daw em leh ki yalehke tynre kam ka Yahai, ka Dat Moopoin, ki ku siej, ki siat maibul wa kiwi kiwi de.
Kani ka tamasa man ko leh wow kynmoo warom yaka khanatang u Woh Ryndi, ka Lidakha kiwa yatoh waka wah Waikhyrwi wa kiwi kiwi de ki yong u warim wa jah. Heijooh i por leh wow yalap cha ki bru yei kordor ki soodong sookun yong ka bei rymaw wei wow pynku leh ya ka rwai ka siaw, ka put ka tem ki khon khynroo khyllood ka Bri u Ynñiawtrep deilang wa ki kaam uiñke suwari haka thaaiñ.
Haka 13 tarik heipor step daw em ka yakob dro dur neibynta ki khynnah wa hapoh 14 snem wa kiwa 14 snem chaneiñ heiwa kiwa yoh nyngkong daw yoh ki T. 5000, kiwa yoh wa ar daw yoh ki T. 3000 katwa kiwa yoh wa le daw yoh ki T. 2000 samen wei kani ka yakob u sdang ko heipor 11:00 waje i step hadooh 1:00 waje i sngi.
Ha kani ka sngi leh daw pynman ya ki yalehke tynre nadooh 2:00 waje i sngi hadooh 4:00 waje i janmiet.
Nadooh 4:00 waje won daw sdang ki tem ki put daka Whoosh kawa man ka Rock Band na Dkhiah West, iwa pynbood daka Orchestra Band na Dkhiah West wa uwa rwai wa jop yaka JGT 2021, u Jefferson Lyngdoh.
Hadien ini daw em ka Cultural Fashion Show da ki khon khyllood ka chnong Dkhiah West, i rwai naka Mercy Ngamlai kawa yoh wa ar haka JGT 2021, na u Mechanki Dkhar, i tem naka Never End kawa man ka Rock Band na Shillong, i rwai naka Kyntiewlin Mawphniang, naka Jessi Lyngdoh N Crew, wei daw em sa ki DJ kiwa kynthup ya u DJ D Frex uwa na Iongkaluh, East Jaiñtia Hills wa u DJ Gavian wei daw pynyoo leh yaka Live Telecast ka yalehke Semi Final wa nyngkong ka World Cup heipor 12:30 pyrdi synyaw.
Haka 14 tarik daw sdang heipor 2:00 waje i sngi da ki yalehke tynre namo ki Traditional Games hadooh 4:00 waje i janmiet wei daw sdang ka tem ka da ki Hard Not Died kiwa na dkhiah, ki Lynx kiwa na Jowai wei da pynbood saka Fashion Show na ki khon khyllood ka chnong Dkhiah West.
Daw em leh i chaad naka Riakor N Sanki kawa na Wapung kawa man kam ka Finalist haka JGT 2022 wa i rwai wa kyrpang naka Orchestra Band kawa na Dkhiah. Wei ha kani ka sngi daw emlang u Kyrmen Shylla, MLA ka thaaiñ kam u kongsan.
Daw yoh leh ki rwai na u Wanjop Sohklet uwa rwai wa pawnaam ka Ri- War, u DJ Banshan waka Lilly Sawian.
Daw pynbood da kiwa tem na Jowai wa tip kam ki Sies Euphony wa ki Dew Drops kiwa tem Reggea wa pawnaam ka Rymbai.
Dep te sdang sa kiwa tem wa pawnaam ka Sikkim kiwa da wan tem leh cha Europe, kitæ ki Girish and the Chornicles.
Hadien kini daw pynchongchit da u DJ DBryan wa u DJ Zethan kiwa na Shillong.
Ya kani ka tamasa daw pynkut deiwa pynyoo Live Telecast yaka Semi Final wa ar ka World Cup heipor 12:30 i pyrdi synyaw.
Kamtæ da khut sñiawbha ya phi wow ya wan phi cha kani ka tamasa. Yow tip bniah chooh chooh ye wow Phone ha kini ki Number: 9862920983, 7005444350.
