Da ka lama ka ri wa jrong 75 meter rah ki khynnah skur ha Jowai kam chibynta ka lehkmen Independence Day

Ynne kam chibynta ka sngi lehkmen yei yoh laitlooid ka ri India wa tip leh kam ka 78th Independence Day, neiliang ka Akhil Bharatiya Vidyarthi Parishad (ABVP) Jowai Town Unit da pynman ko ya ka Tiranga Rally kawa man yow rah ya ka lama ka ri deiwa lai kjat.

Yeini da pynman heipor 7:00 waje i step deiwa sdang nadooh na Iawthymme Ladthadlaboh wei da pynkut ha District Library Jowai.

Ha ini i lai kjat da rahlang ya ka lama le rong ka ri kawa jrong 75 meter deilang wa kiwi ki lama khian.

Yow leh yeini waroh da wan wow chimbynta da palat 200 ngut ki khynnah skur, ki khynroo khyllood deilang wa ki bru paidbah.