Jowai : Ka National Service Scheme (NSS) yong ka Thomas Jones Synod College Jowai ha ka 30 tarik u Khonchonglad da pynman ki ya ka Special Camp deiwa chna luti lai kjat ha ka chnong Ammutong wa haap hapoh ka Amlarem Civil Sub-Division West Jaiñtia Hills District.
Kani ka luti lai kjat ha ka chnong Ammutong toh nadooh ka skur Ammutong Upper Primary School hadooh u sarok heh wei i jrong yong kani ka luti lai kjat em ko kamwa 160 meter.
Da sdang ya kani ka camp nadooh kani ka 28 tarik u Khonchonglad wei u pynkut won ha ka 3 tarik u Kmaichonglad.
Ha kani ka camp da wan chim bynta chna luti lai kjat da ki Student Volunteers ka NSS kiwa em kamwa 40 ngut wa kynthup ya 15 ngut ki kynthai wa 25 ngut ki chynrang hapoh i yahkhmat ki le ngut ki Programme Officer u Wandy Lamin, u Dakyntuhimi Lyngdoh wa ka Penial War.
Kini ki dkhot ka NSS Unit Thomas Jones da sah ki dei sah miet ha kani ka chnong ha ka wi ka yung skur Govt.L.P School Ammutong wei da chet da tu ki ha ka yung chet ja ka skur.
Ki Programme Officer da khana ki wa i pynman ya kam kani ka Special Camp ha kani ka chnong da man ko ka sien wa ar, ynnin u snem da pynman ya ka Health Camp, yaleh sports, yakop dro wa kiwi kiwi katwa ha uni u snem da chna ki da ka luti lai kjat.
Daw pynman leh ya ka yakop kynjat bol hapyrdi ki khynroo ka chnong Ammuthong wa ki dkhot ka NSS, daw em leh ka Cultural Programme heipor miet.
Da khana leh wa ki dkhot ka NSS kani ka College jooh lai chim bynta ha ki Camp waphær waphær kam ha Kolkata wa ha Arunachal Pradesh wei ya ka yutip wa yoh ki na kini ki Camp da sikai ki ya ki dkhot ka NSS unit ka Thomas Jones.
Neiliang u Pynshailang Tariang, Waheh Chnong wa u Majesty Sten dkhot ka EC chnong, pyngsñiaw ki ya i mynsien sñiawngooh yei wa wan ka NSS iwa wanrah yei roi i par ha ka chnong.
Discussion about this post