Ka Loomkyntoor Resort kawa em ha Shkenpyrsit kam chibynta wow lehkmen ya ka lyngkhooh snem wa nyngkong i lai luti kam ka thaw sah, thaw lai uiñke pyngaad, ynne da booh mooyurim yow chna ya ka madan wow pynman ya ki tasama nadooh ki yaleh Futsal hadooh ki tem ki put kawa em hapoh kani ka Resort hi.
Neiliang u tre ka Loomkyntoor Resort, u Teiborlang Hing da pyntip u wa ya ka madan da chna leh dei thmu wow pynman ya ka Music Festival kawa heh bha ha u snem wow wan wei ynne ka sngi leh da man ko kam chibynta wow lehkmen yei dap 25 snem i lai luti u kam uwa da seiñ khih namo u Entrepreneur.
Da khana u wa ha i lai luti yong oo da dep u wow sdang boon ki jait kreh wei da em leh chiboon ki wym man kaam kiwa da hap wow khang tangwa ini waroh ym em pyndooh mynsien ko ya oo wei da lai bait u chakhmat wow pyrchang ya kiwa boon ki kaam wei da e khublei u leh ya waroh kiwa da yarap ya oo khamtam kiwa da pynman ya kani ka Loomkyntoor Resort kawa jop wei da angnooh u wow pynman ya ka kam ka 5 Star Resort hadien san snem.
Ha kani ka sngi da emlang leh u Wailadmiki Shylla, MLA ka Jowai, uwa da yaroh ya u Teiborlang wa kam uwa seiñ khih da pynmyntoi u ya kiwa boon ki manyung wei oo won kam uwa mihkhmat leh da dep u wow sdang ki e sikai yow pynchlur ya ki bru wow yieñ hei kjat yong ki hi ym toh wow yooluti du hei kreh sorkar neibhah ym ye e kreh sorkar ya waroh.
Da kdaw u leh wa ka sorkar kawa katni toh kawa da pynlut bor bha wow pynchlur ya kiwa seiñ khih wei emkaam wow pyrkhat ya iyi i daw wa kiwa boon ki khih ki khan da yoh da kiwi ki jaitbru wow leh hapoh ka jylla kamtæ toh u khyrngiat noh wow sdang da i yong i hi i khih wei ka sorkar leh man ko kawa da pynkhreh wow yarap, kamtæ da emkaam wow pynphær noh i yei rukom pyrkhat.
Neiliang u kongsan ha kani ka yalang, u Dr. W.R. Kharlukhi, MP Rajya Sabha da ong u wa ki thaw ki bhaw wa em cha i nadooh ki kchaaid toh kiwa miat bha hawa nujor wa kiwa em cha kiwi ki jylla tangwa kiwi ki jylla won da ye ki wow pynpawnaam ya ki thaw uiñke suwari ki deiwa stat ki wow pynpoor pyrthai yei naam.
Kamtæ da ong u wa deiwa em kam kini ki Resort daw ye ko wow pynpawnaam ya ki thaw wa em cha i.
Oo leh da pynchlur u ya kiwi wow bood ya ka nongmuna u Teiborlang wow seiñ khih yow yoh kreh kiwi neibhah hapoh ka jylla kamwa man kattæ em kamwa 12,000 tylli ki Home Stay, ki Hotel wa ki Resort tangwa dang emkaam sa 18,000 tylli neidaw wa boon kiwa uiñke suwari kiwa wan heiwa ha uni u snem 15 lak ngut kiwa wan wei uni u snem ym pu em kut u.
Ha kani ka sngi da emlang leh u SP ka West Jaiñtia Hills District u BD Marak, u Lakhon Dkhar, MDC ka Sohmynting-Khliehtyrchi, u Khroobok Passah, DSO ka West Jaiñtia Hills District wa kiwi kiwi de.
