Da i thmu wow pynchlur wow e mynsien yaki khynnah wa lai puræ kiwa da leh bha ha ka puræ puthi waphær waphær, ka KSU Marshillong Unit haka 7 tarik uni u bnai da pynkupburom ko yaki 5 ngut kiwa lai puræ yong ka thaaiñ.
Ya kani ka yalang pynkupburom da pynman ha Lyngdoh Wanniang Secondary School, Marshillong deiwa emlang u Synsharlang Lyngkhoi kam u kongsan, u Gilbert Thongni uwa man u Montri chnong yong ka chnong Marshillong wei da emlang leh ha kani ka sngi da kiwa yahkhmat ka KSU nadooh u Redyonstone Nongrum (Asst. General Secretary KSU Seiñbei), u Raymond Kharjana (Education Secretary KSU Seiñbei), u Jiedskhem Nongsiej (General Secretary KSU South West Khasi Hills District), u Pulljohn Wanniang (Asst. Education Secretary KSU South West Khasi Hills District), u Pauldeep Tongwah (President KSU Mawkyrwat Circle), u Rutherford Lyngdoh (General Secretary KSU Mawkyrwat Circle) wa kiwi kiwi kiwa yahkhmat ka seiñ.
Hawa klam ha kani ka yalang, neiliang u Gilbert Thongni uwa man u Montri chnong yong ka Marshillong da e khublei u yaka KSU kawa da chim ya kani ka bynta wa khroo wei da e mynsien u leh yaka seiñ wow nang ku na i por cha i por. Neiliang u Raymond Kharjana (Education Secretary KSU Seiñbei) da ong u wa ki khynroo khyllood wow nang krehchitom chooh chooh khnang wow nang ye wow kynjoh cha ka naam khlem da mylliñ yei man kyrpang yong ka jaitbru mynstep man kawi.
