Hajrong ka thong u yakhun pyrchah yei drugs haka District, ka jylla waka pyrthai hi waroh kawi, neibhah wa man u jait dih wa ktah yaka imlang sahlang, kamtæ neiliang ka Mihmyntdu Community Social Welfare Association (MCSWA) chirup i yakrehlang waka District Legal Services Authority, West Jaiñtia Hills kamjooh i kyrchaan ka Meghalaya AIDS Control Society (MACS) da pynman ki yei phet Marathon wa i pynsñiawthooh paidbah ynne i step wada sdang na Laad College wei da pynkut won ha Mission Compound Jowai.
Ha kani ka Marathon da chimbynta kynthai wa chynrang, wei da synraan lang leh kiwa yah Cycle wa kiwi.
Hadien wa waroh kiwa chimbynta dapoi lut ki ha Mission Compound, neiliang ka Dr. A. Paswet Psychiatrist waka Dr. J. Shullai, Director MCSWA da batai ki hajrong i maa i pynemkaam drug kamjooh leh kammon ktah u ya u bru wa dih waka yung ka sem weiwa yaka imlang sahlang.
Hawa khut kyntu kyrsu yei yakrehlang yong waroh yow ye yakhun ya u drugs, ka Dr. A. Paswet kyntu ko leh ya kitu wa da chah kdoh chah khoom wow em ki i mon wei bor wa khlan u yakhun pyrchah, neibhah hawa sdang hi mut ki u maad donhi khlem pyrkhat khlem da tip wa daw chah kdoh chah khoom hadien.
Kamtæ da ong ko wa chisien da maad da saja u yait neibhah ka kyrni dih namo ka Addiction da man ko ka kjut ha u bru, na ini i daw toh u jied yow im ym toh yow drug.
Ka Dr. J. Shullai pyntip ko wa i kaam ka MCSWA toh u e yarap yaki bru wada ngop, tangwa du ki wym ye, neitæ i daw emkaam ki yei yakrehlang yong waroh nadooh na samen, kiwa ha yung waka imlang sahlang.
Kyntu ko leh ya kitu wada ngop wow lai mih cha ka chnat krehkaam yong ki yow yoh i yarap, wei wymtoh leh u pynbor næ u khut ya kiwi won ki lok u ngat lang ki how drug neibhah ka kiad wei drug toh iwa da pynyap ya boon ki mynsien bru haka pyrthai.
Hadien ini da saam leh yaki khusnaam cha kiwa jop Marathon wa kynthup ya u Chanmiki Chyrmang uwa yoh nyngkong, wa ar u Laibait Savio Dhar wa le won u Elias Saioo.
Ha ki kynthai won da wan nyngkong ka Answerable Suting, wa ar ka Nangkiewsuki Slong wa le ka Arlangki Suchiang.
