Ka Deputy Commissioner, East Khasi Hills District, ka Isawanda Laloo ynnin ka sngi da sdang ko ya ka Payment for Ecosystem Services (PES) Scheme ha Conference Hall ka yung krehkaam yong ka hi. Ya ka yalang da pynman deiwa ya krehlang wa ka Meghalaya Basin Management Agency (MBMA) waka District Project Management Unit (DPMU), East Khasi Hills.
Kani ka PES Scheme hapoh ka jylla toh kawa da sdang da u Montri Rangbah, u Conrad K Sangma ha ka 13 tarik uni u bnai.
Hapoh kani ka Scheme daw e yarap poisa T. 8000 chi Hectare chi snem neibynta san snem. Najrong kani, daw e leh sa T. 5000 chi Hectare chi snem cha ki khloo wa da em chwa kiwa da dep wow tipmit kam ki Community Reserve da ka Forest Department wei daw e sa T. 2000 chi Hectare chi snem cha ki thaw wa em ka khloo wa rben lane kiwa da tipmit kam ki khloo kyntang lane kiwa em ya ki yingkieñ jri lane kiwa man kam ki Eco-Sensitive Zones wa em harood ki National Park, Wildlife Sanctuary lane ki Wildlife Corridor.
Lada i khloo toh i wym pu em tipmit namo Register, ye wow yaleh yow yoh yarap na kani ka Scheme deiwa lai Register ha ka Forest Department wei lai rah ya ka Receipt manda yaleh ya kani ka PES Scheme.
Ka I. Laloo hawa e yei klam da ong ko wa ka PES toh kawa da pynkrehkaam da ka Community Led Landscape Management Project (CLLMP), wei i thmu toh wow e yarap poisa ya ki chnong, ki kur hadooh ki bru samen kiwa kwah wow pynneh pynsah ya ki khloo neibynta 30 snem yow yaleh pyrchah yeiwa da dooh kamjooh yow yoh yei ya krehlang yow pynkrehkaam ya kani ka Scheme ha ka District.
Da ong ko wa ka Meghalaya kawa man ka jylla hapoh ka 6th Schedule, kiwa boon ki khloo toh kiwa mantre da ki chnong, ki kur ki jait wei lyngba kani ka Scheme daw pynkupbor ko ya kiwa pait ya kini ki khloo yow pynneh pynsah ya ki.
