Kamwa da ya tip wa ki ASHA ha man ki chnong ki thaw toh ki bru kiwa hakhmat dooh wow chim yei kitkhlieh wa i chakri ya ki paidbah neibynta i chait i khiah yong kiwa chong chnong khamtam ha kam kini ki poor wa tynjooh ka khlam COVID-19, tangwa hawa pait ha iwi i liang, man ko iyi iyi ka khubor wa pyndooh mynsien ya ki ASHA neibhah hapyrdi i yaleh wa i kreh chitom deiwa booh hei maa yei mynsien wa kordor, ym yoh won ki yei su wa biang næ ka bai nong wa tikna kamwa toh u yoh na ka sorkar.
Kamtæ neiliang ka Dorbar Chnong Loompyrdi Iongpiah, Jowai kam chibynta wow e bor e mynsien ya ka ASHA kawa da kreh borbah ha kam ini i por hapoh ka chnong ka thaw, da chong pyrkhat wow yarap noh da ka poisa katwa joh bor wei da i sbun mynsien yong ki ar ngut kiwa chnong chnong wa kynthup ya ka Ribiang Najiar wa u Pynsakhiatyeini Kyndiah, ka Dorbar Chnong da yoh ko wow ekti ya ka song pisa wa T. 13,000.
U Alan Niangti, Waheh Chnong Loompyrdi Iongpiah, Jowai hawa e yei klam maitphang ha ka yalang wa da pynman ynne ka 13 tari, da ong u wa ka ASHA toh sakhiat katæ ka bru kawa da mylliñ ya idæ wow kreh ya i kamram kawa da pynkup ha ka, khamtam ha kam ini i por wa wan u khñiang khlam COVID-19, da e mynsien wa wot hapyrdi i tynjooh wa wan ha ki dur ki rukom waphær wow man ki bru wa yaichah khlem kynran dien.
Chooh chooh ha kani ka yalang da yoh leh yei klam wa tbian na ka ASHA kamjooh na ka Ribiang Najiar wa u Pynsakhiatyeini Kyndiah kiwa da e yarap sbun mynsien cha ka ASHA wei da yoh ya ki kyntien pynkut neiliang u Bimi L. Suwer, General Secretary Loompyrdi Iongpiah, Jowai.
