Ka National Investigation Agency (NIA) ynne ka sngi da pynbna ko wow e da ka poisa ya kiwa yarap wow yoh kem ya ki dkhot ka PLA waka MNPF deiwa khut ya ki kam ki Terrorist kiwa da em 10 ngut heiyatoh wa i siat yap wei tympdung bomb ki ya ki chipai ka 46 Assam Rifles iwa da jia ha ka 13-11-21 hajan i chnong Sialsih heipor wa lai luti ki hajan u pood ka Indo-Myanmar iwa haap hapoh ka Churachanpur District ka Manipur.
Kam wow pynkynmoo wa ha ini i jia da yap 5 ngut ki chipai ka Assam Rifles wa kynthup ya u Commanding Officer wei da yap leh ka kurim wa u khon u heiwa kiwa mynsoo ki chipai ka Assam Rifles da em ki 6 ngut.
Ka NIA da ong ko wa da thooh ya kini ki 10 ngut kiwa tip pyrtuid kam u Chaoyai uwa tip leh kam u Pukhrambam Mani Meetei, u Sagolsem Inaocha uwa tip leh kam u Ranjit Naorem heiwa ya kini lada em wa pyntip chaphang yong ki daw e poisa mar T. 8 lak.
Ya u Sanatomba lada em wa pyntip daw e ya ki T. 6 lak.
Ya u Khaba, u Khwairakpa, u Nongyai uwa tip leh ka u Nongphai, u Joseph, u Balin wa u Kanta uwa tip leh kam u Santa daw e mar T. 4 lak.
Ka NIA da pyntip ko wa kiwon kiwon kiwa wan chakhmat wa pyntip yow ye u kem ya kini ki 10 ngut daw murieh yei pyrtuid yong ki wei ye leh wow Phone ha ka NIA HQ Delhi Control Room ha u Number 011-24368800 lane deiwa Email ha [email protected].
Ye leh wow pyntip cha ka NIA B.O Imphal Control Room deiwa Phone ha u 0385-2415135, Mobile-6909366178 (WhatsApp/Telegram). Email: [email protected].
Puræ leh: Chah siat yap u CO ka Assam Rifles deilang waka kurim wa u khon ha Manipur
