Hadien wa ki warep ka Pynthorneiñ da maad ki yei chah pynjæd pynsih ki hali rep kba nei wan tlep ki moo i khyndaw wow chyiap kiwa kai lyngba ka Liar Pamkam ha kini ki por slap wa dadep nei pynkreh ya u sarok Jowai Bypass wa pynyabi na Treïongriang cha Khliehtyrchi, iwa da wanrah i dooh nong wa khroo ya ki.
Ha kani ka kynti won da sdang ki wow yoh mynsien neibhah wa ka chnat PWD da mih ko chakhmat wow su da ka poisa heiyatoh i dooh nong yong ki, kamjooh leh wa da kular pynkhooid ko yei khyndaw u chyiap ha waroh ki hali wa chah tlep, najrong wa da sdang leh i pynkhoid ya ki moo u chyiap i khyndaw hei bynta yong ka Liar Pamkam.
Kamtæ ynne ka sngi kawa man ka sngi sdang pynkhooid ka chnat PWD ya ka Liar Pamkam, da wan sakhilang ha kani ka thaw da ki sahep ka chnat PWD wa kynthup ya u H. Nengnong, Executive Engineer Jowai Central Division, u O. Thubru, Asst. Executive Engineer PWD NH Sub-Division Jowai, u S. Challam, Junior Engineer NH Sub-Division Jowai, u A. Lipon, Sectional Assistant NH Sub Division Jowai kamjooh leh hei emlang ki warep wa ki tre thaw.
U O. Thubru da ong u, hei sakhiat i pynkhooid ya ka Liar Pamkam da toh u dep, tangwa na ki daw wym ya sñiawthooh yumut hapyrdi u waheh chnong Khliehtyrshi, ki warep wa ki tre thaw da pynsangeh chwa chipor, neitæ hadien wa da ye u ya pynbait da sdang biang yei pynkhooid ynne ka sngi.
Da ong u leh wa neiliang ka Dhar Construction Company kawa pynkreh ya uni u surok chirup i yakrehlang ka yung krehkaam u, katwa joh wa jam i bor da pyrchang ki u e yarap da ka poisa kamjooh leh wow pynkhoid ya ki moo ki chyiap wa khyndaw.
Kamtæ yooluti u wa ini i ya sñiawthooh yumut u yarap ko hajrong kammon u pynbha pynmiat ya ki hali rep kba wa kamjooh leh ya ka wah Myntdu. Wei lada jia biang ini neini chakhmat heipor slap, ong u wa daw pteiñ biang ki ya ki laad e yarap.
Ha kani ka sngi neiliang ki warep wa ki tre thaw wa kynthup u Kam Pakynteiñ, ka Middle Pakynteiñ leh pynsñiaw ki yei sñiawngooh ya ka chnat PWD wa da chimkhia ko u pynyoh ki laad yarap cha waroh 11 tylli ki manyung wa chah ktah.
Iwa dang sahteiñ katni toh yow pynkhooid ya ka Liar Pamkam wa ya ki hali rep kba wa chah ktah.
Wei hajrong ini ong u wym em artatien ki neibhah wa dadep yasoi soskular haroh ki hapyrdi ki warep waka chnat PWD, wa yei pynkhooid ymtoh du ini chisien, tangwa lada jia wa chah ktah biang heipor slap, ka PWD daw chim ko i bahkhlieh wow pteiñ yei pynkhooid.
Kamtæ yooluti ki wa neini chakhmat ym em de iwon iwon i pynwit pynthut wei yow lai bait lai ryntih noh khnang yow yoh biang ya u khoo u kba wei u yoh ki leh u rep man-u-snem.
Puræ leh: Chah tymmoh ki hali ka Pynthorneiñ da ki moo, u chyiap wei khyndaw wa chah rah nei kreh sarok
Discussion about this post