Ynne ka sngi da seiñ ya ka Joint Action Committee (JAC) ka Nartiang Khanduli Area kam chibynta wow pyndooh ya ki bru jrahsnaam kiwa pyntieñ pynsmiej ya kiwa chong chnong ha kani ka thaaiñ wa khamtam ya kiwa lai wa wan ha ki luti syngkieñ.
Da seiñ leh ya kani ka JAC hadien wa da dep jia ya kiwa yah kari kamai heiwa kiwa emkti wow chim yei mynsien kitu kiwa yah kari toh kiwa boon hi na kani ka thaaiñ.
Kani ka JAC toh khnang wa ki paidbah wei khamtam kiwa khayi pateiñ u sñiaw chngaaiñ ki u lai cha kani ka thaaiñ kamwa jooh man nachwa heiwa kani ka Committee man ko kawa daw e yarap smat ha iwon iwon i por khamtam heipor miet.
Ya kani ka JAC da khut wow pynman da ka Dorbar Chnong Mudop heiwa u Convener toh u Damon Dkhar wei awjan waroh hi ki Waheh Chnong wa kiwa yahkhmat ki seiñbhalang waphær waphær da wan ki cha kani ka yalang.
Ha kani ka yalang da jied ya kiwa kitkaam yong kani ka JAC Nartiang Khanduli Area kiwa man kamni ha wah:
- President- Damon Dkhar (Waheh Chnong Mudop)
- Secretary- Augustan Timung
- Assistant Secretary- Mutshwa Thabah (Waheh Chnong Saphoh Larnai)
- Chairman- Damain War (Waheh Chnong Namdong-B)
- Organising Secretary- Phrangki Phawa (Waheh Chnong Mynsngad)
- Adviser- Alias Susngi (Waheh Raij Namdong)
Kiwa yahkhmat chnong wa kiwa yahkhmat seiñbhalang daw pynman ki leh ya ka lai paidbah namo ka Rally ha ka 03-09-22, kamtæ da khut ya waroh kiwa yahkhmat chnong wa kiwa yahkhmat seiñbhalang wow wan cha kani ka Rally kawa daw pynman ha chnong Mynsngad yow dawa kset chi rta ya kiwa emkti wow chim yei mynsien kiwa yah kari.
Ka Committee da ong ko leh wa ym ye de wow phah ya ka chithi cha waroh kiwa yahkhmat chnong wa ki seiñbhalang yong kani ka thaaiñ kamtæ wow chim ki ya kani ka wyrta wow ya mih ha katai ka sngi neibynta ka kaam yap kaam im ka jaitbru.
