U DC ka West Jaiñtia Hills da pynkrehkaam u da ka Section 144 CrPC ha ka chnong Pasyih hadien wa mih i kajai, i yaknieh thaw hapoh ka chnong.
Ini toh hadien wa da pyntip u SP ka West Jaiñtia Hills wa em i yaknieh thaw hapyrdi ka Burom Rymbai waka Balang Catholic wa em ha chnong Pasyih, heiwa ha ka 9 tarik uni u bnai da yoh ya ka FIR na u Ioanis Siangshai, Chairman ka Balang Catholic Pasyih waka Yoo Dkhar, Secretary Balang Catholic pyrchah ya ka Burom Rymbai deiwa pynbaad wa da maham ko ya ki dkhot ka Balang wow pynemkaam da ki tiar ki taar katwa dang pynkhreh ki wow lehkmen yei dap 100 snem ka yungmane kawa daw pynman ha ka 29 tarik uni u bnai.
U DC da pynkrehkaam u leh ya ka Section 107/145 CrPC yow khanglaad ya kini ki arliang deiwa mynjur ki wow pynneh yei suk i saaiñ ha ka chnong ka thaw.
Neiliang ki pulit da khuslai ki boi ye wow jia iyi re iyi ha ka 29 tarik neibhah i pynkhreh yei madan lehkmen dang lai i chakhmat iwa ye u yah cha i awri awra, kamtæ u DC leh da mynjur u wa ini ye i wow yah cha i kulmar wa i awri hapoh ka chnong Pasyih.
Hajrong kini waroh da pynkrehkaam da ka Section 144 CrPC yow khang yei yalang palat 5 ngut ki bru, u khang yei psiah khlem yoh bor cha i thaw wa em i ya kajia lane u leh iwon iwon ha ini i thaw wow wanrah chei pynthut yei chongsuk chongsaaiñ.
Kani ka hukum toh kaw krehkaam chi syndon.
