U DC ka West Garo Hills kam chibynta wow pynsñiawthooh paidbah yei maa i pynemkaam drugs wa i khayi drugs heijooh i por leh yow wanrah yei im deiwa em i suk i saaiñ ha ka imlang sahlang, da pynbna u ya ka mynstep ka 26 tarik kam ka ‘No Honking Day’ namo ka sngi wym hoi u pynkieh Horn hapoh waroh ka West Garo Hills District.
Ini toh iwa daw sdang nadooh 8:00 waje i step hadooh 4:00 waje i janmiet.
Ka hukum da ong ko wa ka ‘International Day against Drug Abuse and Illicit Trafficking’ toh kawa da ban joor yei emkaam u ya krehlang yow pyndooh yei dih wei dai drugs wei kam chibynta ini yow pynman yei pynsñiawthooh paidbah kamjooh yow wanrah ya ka soodong kawa jai-jai wei kawa lait nei wit i thut nei awri ki kari wa lai wa wan wa pynkieh Horn hapoh ka District da rai wow pynman da ka ‘No Honking Day’.
Kamtæ da pynchlur u ya kiwa chong chnong wow dam u pynkieh Horn yow man ka chnong ka thaw kawa pynngaad ya ki chkor kamjooh yei pyrkhat pyrdaiñ ki bru.
Da booh kyndon wa nadooh 8:00 waje i step hadooh 4:00 waje i janmiet ha katai ka sngi waroh ki kari ymtoh wow pynkieh Horn ki lait noh hawa ym hoi de u dam yow lait na i ya tyrrah kari wei wow pyntip ya kiwi lada em iwa maa tangwa ha kam kini ki por ymtoh wow leh cha palatpood.
Da phah leh ya ki pulit wow pyntikna ki wa bood ki paidbah ya kani ka hukum.
Ym em khang yei pynemkaam Siren da ki kari Ambulance, Fire Brigade wa kiwi kiwa pait ya ki kaam wa yatoh waka aiñ.
