Jowai: Kam ka dak i sñiaw burom ka sorkar yaki Active Community Quarantine Centre wa em ha ki chnong waphær waphær hajrong i chimkhia yong ki wow krehlang waka sorkar wow yakhun ya ka khlam u COVID-19, da pynkhreh ko ya ka song poisa (Financial Assistant) wa T. 5000 lyngba ka CMRF neibynta kawi pa kawi ka Centre, kamtæ ha Jowai ynne ka sngi neiliang u MLA ka 2-Jowai Constitueny u Wailadmiki Shylla da ekti u ya katai ka song poisa cha ki waheh chnong waphær waphær ka chnong Jowai.
Ya katai ka poisa da e kti u haka yalang wada pynman ha Ladthadlaboh hei emlang u Lyngkor Kynjing, ADM, West Jaiñtia Hills District, u MDC ka JHADC u Octomewot Lamin, haka yalang wa pynlai da u waheh chnong ka Ladthadlaboh u LD Lakiang.
Neiliang u MLA wa u Lyngkor Kynjing da pynsñiaw ki yei sñiawngooh ya ki Waheh Chnong kamjooh ya waroh kiwa kreh haphrang dooh namo ki Frontline Workers wada chimkhia ki wow sumaar u yarap ya ki para chnong kiwa da wan na baar wei heijooh i por leh wa da chimkhia ki u krehlang neibynta u yakhun yaka khlam u COVID-19.
“Ha-o sñiawthooh O wa ini i e yarap man i iwa khian, tangwa lyngba ini pynyoo i ya i dak i sñiawburom wakhroo ya phi ki waheh chnong. Sñiawsarong O leh wa toh lyngba i kreh chitom yong ki bor pynlai chnong wa da ye u khanglaad nei poor u COVID-19 haka jylla,” da ong u Wailadmiki Shylla.
Da yooluti u leh wa ym slem de ka jylla u lait ko na uni u khñiang neibhah wa hanlada ha kini ki tayaw wa dep da yoo wa em i ku kiwa yoh kjut leh, tangwa kattæ da sdang hiar kiwa chah ktah.
Heijooh i por da khana u wa ha West Jaiñtia Hills District da em kamwa 115 tylli ki Community Quarantine Centre, hapoh Thadlaskeiñ C&RD Block 53 tylli, ha Laskeiñ C&RD Block 28 tylli, ha Amlarem C&RD Block 23 tylli, ha Jowai 11 tylli wei hadooh ynne ka sngi em kamwa 238 ngut kiwa dang sah hapoh ki Quarantine Centre.
Heiyatoh neibynta i e yarap cha kiwi tawon ki chnong wa em hapoh ka District, u haap ki hapoh i pynbait yong ki Block yong ki waphær waphær.
