Ka yung krehkaam ka District Sports Officer, East Jaiñtia Hills District deiwa ya krehlang wa ki bor District, ynnin da pynkup burom ki ya kiwa yoh Medal ha ki yalehke hapoh ka jylla (State Level) kiwa mihkhmat ya ka East Jaiñtia Hills ha ki yalehke Athletics wa Football.
Ya kani ka yalang pynkup burom wa da pynman ha Conference Hall u Deputy Commissioner ha Khliehriat deiwa emlang u DC, u Shivansh Awasthi kam u kongsan deilang ka Additional Deputy Commissioner, ka J. U. Kharpuri, ka District Sports Officer, ka S.M. Rapsang, ki dkhot ka East Jaiñtia Hills District Sports Association, ki waheh chnong, ki Athletic Coach kamjooh kiwa yalehke wa kiwi de.
U Shivansh Awasthi hawa e yei klam da yaroh u ya ka District Sports Officer wa chim ko ya kani ka luti wow pynchlur ya kitu kiwa da wanrah naam ya ka District wei da khana u leh yeiwa da leh ka sorkar yow kyrchaan ya kiwa yalehke.
Da ong u leh wa ka sorkar u e ko waroh iwa ye ko u yarap deiwa chna chiboon ki thaw yalehke wei da em leh ka Talent Identification Programme wa pynkrehkaam da ka Directorate of Sports and Youth Affairs.
Ha kani ka pynkup burom da e da ka poisa cha waroh kiwa yoh takma ha ka State Level Inter School Athletics Meet 2023-24, ha ka Under-14 Years (Boys) State Level Subroto Mukherjee Cup Football Tournament 2023, ha ka Under-17 Years (Boys) wa Under-12 Years (Girls) Chief Minister’s Youth Development Scheme (CMYDS) Football Tournament, 2023 wa cha ka Athletic Coach ka District.
Discussion about this post