Ynne ka sngi u Montri Rangbah ka jylla, u Conrad K Sangma da pynkup burom u ya ki 188 ngut kiwa yoh takma wa ki 54 ngut ki Coach kiwa da embynta ha ka 2nd North East Olympic Games (NEOG) 2022 wei da pynbna u leh ya ka Sports Scholarship Scheme ha kani ka yalang wa pynman ha U Soso Tham Auditorium, Shillong da ka chnat Sports and Youth Affairs.
U Conrad hawa e yei klam da pyn-ehdaw u ya kiwa chimbynta, da e kublei u ya waroh kiwa chimbynta ha ka lympung 2nd NEOG deiwa ong wa ini i pynkup burom man i kam chibynta wow lehkmen yeiwa da rah burom ki chynrang wa kynthai yaka jylla.
Da ong u leh wa kamwa 12 lak ngut kiwa chong chnong ka jylla toh kiwa em hapyrdi 12-30 snem i rta wei i kaamram ka sorkar toh wow wanrah yaka luti katkam ka sap wa em ki khnang wow poi ki cha ka thong i jop mynried mankawi deiwa pynemkaam yei bor ki ha ki kaam wa bha heiwa ka sorkar leh da sdang ko yaka Meghalaya Grassroots Music Programme, ka Aspire Programme wa kiwi kiwi de.
Chooh chooh da ban joor u hajrong i emkaam wow wanrah ya ki thaw wa paka kiwa janai neibynta ki khynnah wow ye ki u pynjra doh wei wow pynpliah ya ki sap wa em ki. Heiwa da pynchna leh yaka JN Sports Indoor Stadiu waka PA Sangma Indoor Stadium.
Heiyatoh wa ka Sports Scholarship Scheme wa da pynbna ynne da ong u wa daw e ya ka bai baam wa man-u-bnai cha kiwa yalehke ka jylla kiwa da yoh takma ha ki lympung ka thaaiñ wa ka ri wei daw e leh ya ka song poisa kawa chisien wow kyrchaan yeiwa emkaam ki heiwa ki khynnah kiwa chimbynta ha ka NEOG 2022 toh kiwa nyngkong ki wow myntoi na ka.
Ha kani ka sngi da emlang u Dr. Vijay Kumar D, Commissioner & Secretary, Sports and Youth Affairs, u S Awasthi, Director, Sports and Youth Affairs wa kiwi kiwi.
