Ka Ministry of Education ka sorkar India ha ka thong yong ka National Education Policy 2020 da pynmih hukum ko ha uni u Naiynru wow em ka Programme wa kyrpang ya ki khynnah skur ha waroh ka ri India kawa tip kam ka ‘Summer Camp’ ha ka phang wa ong ‘Eco-Club for Mission Life’ wei ka wow man nadooh ka 5 hadooh ka 12 tarik uni hi u bnai.
Hapoh ka jylla katkam ka hukum wa da pynmih na ka yung krehkam u State Project Director, SEMAM-SSA, ha ka 5 tarik, ki skur wa em ha West Jaiñtia Hills da kitkhia ki wow pynman ya kani ka Summer Camp katkam ki sarin wa da booh hajrong ki mat ki phang waphær kiwa man neibynta i myntoi yong ki khynnah.
Kani ka Summer Camp u man ko 7 sngi lynter wei kiwa sikai em ki ka bynta wa khroo wow khriñ yei pyrkhat pyrdaiñ ki khynnah chaphang kammon u man ki kitæ kiwa chong chnong næ ki pateiñ kani ka juk kiwa tip u burom, kheiñkor yei kyrkhu ka bei ramaw yow bru pyrthai ha waroh ki liang.
Ki mat ki phang waphær kiwa da booh thong u klam u batai hapyrdi ki khynnah skur toh kynthup ya kawa ong ‘Adopt Healthy Lifestyle’, ‘Adopt Sustainable Food System’, ‘Reduce E-Waste’, ‘Reduce Waste’, ‘Save Energy’, ‘Save Water wa ‘Say No to Single Use Plastic’.
Chooh chooh najrong kani ka Programme yow ye ki skur u pynjanai won yei rukom krehkaam yong ki ha ka thong yong ka ‘Eco-Club For Mission Life’, ka yung krehkaam u State Project Director, SEMAM-SSA da ong leh ya waroh ki skur wow chna næ u sdang noh ki ya ka Eco Club heiwa ki dkhot toh u kynthuplang ya ki khynnah skur, kiwa sikai kamjooh neiliang ki manbei manpa.
Discussion about this post