Da ka tamasa ‘1st Choir Festival’ pynman ka SoULS neibynta wow chna ya ka Counseling Centre ha Amlarem

Jowai: Kam chibynta wow kynrong ya ka yarong poisa wow chna ya ka Counseling Centre kawa em ha Amlarem Civil Sub-Division, ka Social Upliftment & Livelihood Sustainability Society (SoULS) yong ka Jingiaseng Samla War Sepngi District ha ka 15 tarik uni u bnai da pynman ko da ka “1st Choir Festival” ha pchem ka Balang Mawlong Presbyterian.

Ya kani ka tamasa da wan wai da u B.J. Kharshandi, EAC WJH hei emlang u G. Rani Assistant Director Border Area Development, ki pastor, ki tymmen wasan, ki waheh balang, ki manbei manpa, ki khynroo khyllood na ki balang waphær waphær kiwa da chah khut sñiawbha.

Ha kani ka Choir Festival da wan chimbynta da 8 tylli ki dhab rwai Choir kiwa kynthup ya ka Jingiaseng Samla War Sepngi District, Balang Sohkha, Balang Darrang, Balang Mawlong, Balang Padu Mawsku, Balang Shnongpdeng, Balang Khonglah, Balang Nongbareh Rim, Balang Kudeng Thymmai wa ki dhab tem wa kynthup ya ka EL-Elyon na Jowai wa ka Pantocrator na Wahiajer.

U Rev. JM. Manner hei klam yong oo da pyntip u wa i thmu wow chna ya ka Counseling Center toh wow pynbha ya ka imlang sahlang wei wow e sikai wow yaleh pyrchah ya ka kiad, i drugs wa kiwi kiwi ki jait dih pynmuaid kiwa boon ki khynroo khyllood katni da ngop ki wei wow pynchlur ya ki wow pyllut por ki ha i puræ puthi.

Related posts

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024

U Rev  N.T. Syad Adviser Jingiaseng Samla War Sepngi District da pyntip u wa ya ka thaw wow chna ya kani ka Counseling Center da e sñiawbha da ka wi ka manbei na ka Balang Mawlong wei hadien ini da pyrkhat wow chna da ka Counseling Center ha ini i thaw.

U B.J. Kharshandi heiklam yong oo da yaroh u ya ka Jingiaseng Samla War Sepngi District.

Da ong u wa em chiboon ki daw wa yah bakla wow poi ki cha ka dih drugs wei kawi na ki daw kawa ha khmat toh wa piah ka manyung mansem, i dooh khih dooh kreh wei da wiar i sñiaw kordor ya i mynsien. Ini waroh da yah ko cha ki kaam wow wa bakla hadooh wow poi cha i tooh i lute wei da em kiwa pynkut pyn da i yong ki hi i mynsien.

Da kyrmen u wa lyngba i em kani ka Counseling Center daw man ko ka kyrkhu ya ki khon khynroo khyllood ka thaiñ.