Ka Khasi Students’ Union (KSU) Laitkor Unit ynne ka 21 tarik da yoh ko wow wai da ka thaw sait that kawa da chna sñiawbha da ka seiñ hi neibynta ki chong Laitkor khnang wow pynsuk ya ki paaid chong chnong yong ka chnong hi waroh kawi.
Ha kani ka sngi da em ka yalang hachwa wow wai ya kani ka thaw sait that kawa pynlai da u Fernando Nongkhlaw uwa man u General Secretary ka KSU Laitkor Unit wei da e ya ki kyntien pdiang sñiawbha da u Kyrmenlang Mawrie uwa man u President ka KSU Laitkor Unit.
U kongsan ha kani ka sngi toh u Lambokstarwell Marngar, President ka KSU seiñbei wa u symbood kongsan u Fredrick Kharmawphlang, Vice-President warim ka KSU seiñbei.
Da synraan lang ha kani ka sngi da u Paiem Ainam Manik Syiem, Acting Syiem yong ka Hima Mylliem, u chongknor (Chairman) ka Laitkor Dorbar Pyllun, kiwa yahkhmat na ka KSU Nongthymmai Circle wa kynthup ya u Eric Nongkynrih uwa man leh u Assistant General Secretary ka KSU seiñbei, ki dkhot ka seiñ khynroo chnong, ki dkhot ka seiñ manbei wa ki dkhot na ki chnat krehkaam waphær waphær yong ka seiñ.
Hawa e yei klam ha kani ka sngi, u Lambokstarwell Marngar da yaroh u ya ka chnong Laitkor wa da pynrkhiñ ko yei psiah i mih wa i chong chnong ki baar jylla haka chnong yong ki.
Da yaroh u leh ya ka KSU Laitkor Unit kawa da ye wow e sñiawbha cha ka chnong ka thaw khamtam ya i thaw sait that iwa daw man i myntoi ya u paaid wa chong chnong yong ka chnong Laitkor hi waroh kawi.
