Ka Akhil Bharatiya Vidyarthi Parishad (ABVP), Jowai ha ka 13 tarik da pynkup burom ko ya ki khynnah skur ka Ri-loom Jaiñtia wa wan chakhmat dooh na kawi pa kawi ka skur haka Result SSLC wa HSSLC yong u snem 2023 wei ya kani ka pynkup burom da tip kam ka “U Kiang Nangbah Best Student Award-2023”.
Haka yalang pynkup burom wada pynman ha District Library Auditorium, Mynthong Jowai da emlang nadooh kiwa sikai, ki manbei manpa, ki khynnah skur, heiwa u Kyrmen Shylla Montri ka chnat Revenue & Disaster Management wa Excise Department ka sorkar jylla da man u kam u kongsan katwa u Puramon Kynjing Dolloi ka Elaka Jowai da man u kam u symbood kongsan.
Ka ABVP toh ka seiñ ki khynnah skur kawa da sdang hajrong ka yurim u pynyaar yei tip i chemphang ha ki khynnah wym du wow tip kat yaka kot wa puræ neibhah emkaam leh u tip ki yeiwa em soodong sookun yong ki.
Katwa kani ka pynkup burom won man ko chibynta u e mynsien chooh choh ya ki yow nang lehbha ki chaphrang kamjooh ya kiwi leh yow bood nongmuna ki.
U Kyrmen Shylla hawa e yei klam da yaroh wei e khublei u ya ki bor pynlai ka ABVP hajrong i ye ki u pynman kam kani ka e khusnaam, wei da khut kyntu u leh yei ya krehlang nadooh ki kynthai wa chynrang yow ye u rah naam rah burom yaka thaiñ ka jylla lyngba ki kaam wa bha.
Kamwa ini i e burom da e naam ha u Kiang Nangbah u khlawait ka ri ka jaitbru, neiliang u Dolloi, u Puramon Kynjing ong u wa i man i kiwa embhah tam wa yoh i kam u Kiang Nangbah lym kamtæ ym yoh i yei laitlooid.
Discussion about this post