Ka Ampareen Lyngdoh, MLA ka East Shillong hadien wa yoh ko yei jubab na u Montri ka chnat PHE u Renikton L Thongkhar ynne ka sngi hapoh ka yung dorbar wa ym em duna i pynpoi umkor wa hoi u dih hapoh ka sor Shillong wei i kreh toh wow pynbha pynmiat yei chakri cha ki paidbah.
Neiliang ka Ampareen da sai ko da ka um wa da rah ko ha u klong wa ong ko toh ka umkor ka PHE wa ki dur ki dar ki thaw pynlang um wa pynyoo wa man ki kiwa jakhlia yow paan pynche ya ini.
Da kylli ko leh wa neiyi i daw wa ka Constituency yong ka ha u snem 2018 da yoh um 375 Kilo Liter chi sngi, ha u 2020 da pynduna cha ka 120 Kilo Liter chi sngi katwa ha u 2021 ini ym em kylla i.
U Montri hawa e yei jubab da ong u wa ka Laitumkhrah toh kawa da yoh um na kiwi ki thaw kam na ka Phase-I wa Phase-II wa na Umkhen Water Supply Scheme wei ye u man wa da chah ktah ko neidaw wa sih ki Pipe hapoh katai ka Scheme iwa da pynman wow duna i poi um.
Ka Ampareen da ong ko wa lada kamni tngit ka um, ki bru lada ym yap ki na u COVID daw yap ki na ka Cholera.
U Montri da ong u wa kamwa man kattæ hadien wa sdang pynkreh kaam ya u uwa thymme u Gravity Main Line nadooh ka 2 tarik uni u bnai uwa heh 1000mm da chem wa jngud ka um wei yeini leh da pyntip cha ki paidbah wei da kyrpaad leh ya ki wow man ki kiwa yai chah sa kattu katni sngi. Da ong u leh wa neidaw wa uni u Pipe toh uwa da pynthiah pyndem da rap slem, da lang khyndaw ha oo wei manda pynlai um na oo, ka um da man ko kawa jngud. Wei emkaam wow pynekmaam ya uni Pipe thymme uwa heh yow pyntikna wym duna um wei hap wow leh ya ini yow pynkhooid ya ka um.
Tangwa neiliang ka Ampareen da sai ko da i dur wow pynyoo wa ka um da tngit chwa ko pyn na i thaw pynlang um namo ki Reservoir.
Neiliang Renikton da pynche u wa nadooh wa pynemkaam ya u Main Line wa thymme da taan da u uni u Pipe cha ka thaw pynlang um wei ya kani ka jooh da phah cha ki bru kamtæ hap wow leh ya ini hadooh wow khooid uni u Pipe.
Heiyatoh wa ka thaw pynlang um ha Umkhen kawa hadooh katni ym em pynchna hadien wa chah ktah ki Pipe ha u snem 2020 heiwa ka Ampareen da ong ko wa i lut wow pynchna ya ini u chongdor i du T. 50 lak tangwa hadooh katni ym em leh iyi iyi.
U Montri da pynche u wa yow pynchna ya kani ha Umkhen Water Supply Scheme wa da kheiñ dor da ka chnat toh T. 13.02 klur.
Ka Ampareen da khana ko wa du ha yung yong ka samen hap ko wow pynlut T. 63,000 chi bnai du wow thied um, da kylli ko kammon kiwi u leh ki ki wym yoh poisa. Kamtæ da ong ko wa wym hun ko ya iwi leh i jubab wa e u Montri.
