Ka War Jaiñtia Student Union (WJSU) kawi na ka seiñ wa da pynkhai im biang hadien wa da wiar ko ha u snem 2015 neidaw wym em kiwa yahkhmat. Ha kani ka kynti hadien wa da pynkhai im wei chimkti da kiwa yahkhmat wa thymme deilang i e buit kiwa sdang yaka seiñ, da lai ko chakhmat wow booddien ya ki rukom krehkaam ka seiñ neibynta i bha i miat yong ka thaaiñ Amlarem Civil Sub-Division.
Hei lai luti yow chim ya ki phang waphær waphær wa yatoh neibynta i bha i miat wei myntoi ki paaid ka thaaiñ, ka seiñ da yoo jngai ko wa emkaam u leh iyi re iyi nyngkong dooh iwa yatoh wei puræ puthi neibhah sñiawthooh ki wa i stat i tip toh iwa hakhmat dooh yong iwon iwon i roi i paar.
Heiyatoh wa kani, ka seiñ da rai ko u sdang noh dei wow e Scholarship cha ki khynnah skur kam chibynta u pynchlur hei puræ puthi ya kawa da tip kam ka 1st War Jaiñtia Scholarship.
Yow yoh won yaka Scholarship ki khynnah skur hap ki wow yakhun yaka Competitive Exam kawa daw pynman ha ki Cluster waphær waphær, wei kiwa ye u yakhun toh kiwa da pyndep Class 4, Class 6 wa Class 8.
Hajrong kammon won u yoh poisa neibynta u e Scholarship yaki khynnah skur, ka seiñ WJSU chirup i yakrehlang waka Organising Committee Amlari Model U.P. School da rai ki u dai paidbah da ki Ticket Lucky Draw wei ya kini ki Ticket Lucky Draw da pynlait paidbah leh haka 9 tarik da u Katdoh Rymbui, u heh pulit uwa da chong-ngiah ka jylla ha ka yalang wa da pynman ha Community Hall Pdengshakap chirup i emlang ki dkhot wa seiñ wa sdang ka WJSU wa kynthup ya u Firmly Khonglah, u Alban K Gashnga, u Venus Gashnga, u Precious Suchen najrong kiwi won kiwa chah khut sñiawbha.
Heiyatoh won wa katwon ka Scholarship u yoh ki khynnah wa chah jied næ kiwa pyndep yaka Competitive Exam, u President ka WJSU, u Namdichai Lamare wa u Publicity Secretary, u Everest Langstang pyntip ki wa chong katkam i ye u pynmih poisa na ka Lucky Draw.
Kamtæ kyrpaad ki ya ki paidbah wow kyrchaan ki yeini i thmu wa bha ka seiñ deiwa thied ya ki Ticket Lucky Draw neibynta u kyntu kynrong ya ki khon ki raiot ka thaaiñ hei puræ puthi.
Ki Prize yong kani ka Lucky Draw toh da ka poisa wa Rs. 2 lak kam ka First Prize, Rs. 1 lak kam ka Second Prize, Rs. 50,000 ka Third Prize wa 15 tylli ki Consolation Prize kiwa man Rs. 10,000 kawi.
U kongsan, u Katdoh Rymbui hawa klam da yaroh u ya kani ka laad ka luti wa da chim ka WJSU, deiwa yooluti leh u man kawa pteiñ chakhmat.
Kyntu u leh yaka seiñ wow man kawa yieñ skem haka yurim, wei kawa em yaka yurim hei lai luti. Najrong wa pynkynmoo u leh ya le tylli ki bynta wa emkaam yaka WJSU u lai ko chakhmat itæ toh u pyrchang hajrong kammon u pynneh pynsah yei tynre, kammon u lai chakhmat wei kammon u yakhun yei dawa wa emkaam haka imlang sahlang.
Haka yalang wa pynlai da u Sumar Syngkor, Education Secretary WJSU da yoh leh i klam na ki waheh chnong waphær waphær, na u dkhot SMC ka School Amlari, na ki dkhot wa seiñ wa sdang ka WJSU wa kiwi.
Waroh kiwa klam ha kani ka sngi da pyn-eh-daw ki yaka seiñ u nang ku ko chaphrang wei i thmu wa bha ko u man iwa jop.
Discussion about this post