Ynne ka sngi kawa man ka sngi lyngkhooh snem wa 158 wa khlaad u Woh Kiang Nangbah ha u tylle pasi, neiliang ka seiñ National People Youth Front (NPYF) kawa man ka seiñ khynroo ka seiñ saiñhima NPP, da pynkup burom ko ya ki le ngut ki khynroo wa kawi ka seiñ na West Jaiñtia Hills.
Ya kani ka yalang pynkup burom da pynman ha District Library Auditorium, Jowai ya kawa da pynlai da u MDC ka Jowai North, u Brightstar Chyrmang.
Neiliang u CEM ka JHADC, u Thombor Shiwat hawa e yei klam da yaroh u ya ka chnat khynroo ka NPP wa da pynman ko ya kani ka yalang pynkup burom hei naam u khlawait ka ri iwa pynyoo yei em mynsien ko wow bood ya ka luti wa yah u Woh Kiang Nangbah.
Da kyntu u leh wa emkaam wa kani ka juk wa katni u pynneh pynsah ko ya ka dustur ka riti yong ka jaitbru Pnar deiwa em i kitkhlieh pyn ha-i hi.
U MLA ka Jowai, u Wailadmiki Shylla da ong wa katkam i parom ki waheh da ong ki wa ka bei yong u Woh Kiang Nangbah jooh ong ko ya oo wow maya u ya ka ri yong oo kamwa maya u ya ka bei u, deiwa kyntu ya ki khynroo khyllood wow bood ki ya kini ki kyntien heiwa lada leh ya iwon iwon i kaam la ha ka yung ka sem wa ka imlang sahlang toh u leh neibynta ka bei ka yong ki.
Da ong u wa kani ka sngi man ko kam ka sngi wow pynkhyrngiat wei ya iwi pa iwi wow yieñ skem ha jar jiar ki kjat, wei da kyntu u leh ya kiwa yoh ya ka Award wow pteiñ wei wow pynjanai ki ya ki kaam yong ki.
Ya kani ka Award da e cha ka Kiang Nangbah Iasiat Khnam Memorial Society neibynta Socio-Cultural Award, u Hameshaniah Suiam wa u Daunipaia Phawa da ka Award on Sports & Youth Affairs wa ya u Wanhi i Challam da ka Award on Fine Arts.
Ha kani ka yalang da yoh leh i klam na u N. Nongkhlaw uwa man kam u National Working President ka NPYF wei da pynkut ya ka yalang da ki kyntien ekhublei na u District President ka NPP West Jaiñtia Hills, u Octomewat Lamin uwa man leh u Nominated MDC ka JHADC.
