Da ka yakob Choh Bom wa ka Siang ka Pha pynman ka KKC Seinraij Jowai

Ka Khynroo Khyllood Committee ka Seiñraij Jowai chirup i yakrehlang ka Dorbar Niam ha ka 21 tarik uni u bnai da pynman ki ya ka dorbar yachemlang wa kyrpang ki khon Khynroo Khyllood ha Madan Knia Pyrthat, Dulong Poh-hali.

Neiliang u Raymond Nartiang, Pator ka Raij Jowai kam u chongknor yong kani ka dorbar da e u ki kyntien pdiang burom wa ki kyntien yahkhmat hajrong ka thong yong kani ka yalang neitæ pynbood won i Ngoohblai Ngoohsyiem da u Samboon Siangbood, Langdoh ka Raij Jowai katwa ki khon khynroo kiwa da e da pachat ya ki kyntien chon yumut ha kani ka sngi kynthup ki ya u Sienmiki Lato na Seiñraij Jowai, uwa da klam ha ka phang wa ong “Ki khynroo khyllood ha ka Tipkur Tipkha” u Kunemiki Passah, Seiñraij Ummulong uwa da klam ha ka phang wa ong “Ki khynroo khyllood ha i maya niam” wa u Sanhiwot Kyndiah, Seiñraij Shillong uwa da klam ha ka phang wa ong “Ki khynroo khyllood ha ka Sngi Kylliang ka Nongkylliang”.

Iwa kyrpang chooh leh ha kani ka sngi toh i yohlaad ki khynroo wow ya pynyoo pyntaw sap lyngba ka Yakob Choh Bom kawa man Dei Choh Bait wa ka Ya Choh Bom Kynnoh katwa neibynta won ki khyllood da pynman da ka yakob pynyoo pyntaw sap hei pyndep ya “Ka Siang Ka Pha” kawa man kawi na ki lehniam wa kyrpang yong ki khon ka Ñiamtre haman ki yung ki sem heipor Behdieñkhlam.

Lyngba ka yakob Choh Bom Pyllah, ka dorbar ha kani ka sngi daman ko kawa chongchit heiwa ki sur yong i rukom choh bom waphær na man ki dong ki chnat mih ki kamjooh man ko leh ka dorbar kawa yoo chongkun chongkhia heiwa ki khyllood naman ki dong ku tyngkong ki wow pynyoo pyntaw yei sap wei rukom pyndep niam yong ki heipor Behdieñkhlam neibynta i burom ki Sangia Saret.

Related posts

Pyndep ka Raij Jowai ya ka Kñia Khang wow e ngooh ya ki Soo Dwar Soo Luti wa ka Tawiar Takan

June 20, 2025

Da pyndep ya ka Kbai Mooknor chwa ka Kñia Khang

June 19, 2025

Chooh chooh chwa wow poi cha ka bynta wa kut yong kani ka dorbar, neiliang u Womlin Pakyntieñ, Kñi ka Kur Pakyntieñ kam uwi na ki waheh wasian ka Raij da e u i klam kysru kyntu ya ki khynroo khyllood hajrong ka phang “I tip niam tip rukom ki khynroo khyllood wa man i ku ka Niamtre”.

Ki dong ki chnong kiwa da yachimbynta ha ka yakob Choh Bom Pyllah toh ka Panaliar, Loomkyrwiang, Dulong, Loomiongkjam, Tpep-Pale, Loompyrdi Iongpiah katwa ha Ka Siang Ka Pha won da yachimbynta ka Panaliar, Loomkyrwiang, Loompyrdi Iongpiah, Dulong wa Loomiongkjam.