Ynnin i miet ka 24 tarik da pynman ya ka yalang wow duwai Blai namo ka Condolence and Prayer Meeting neibynta iwa jia ha Mukroh ha ka 22 tarik heiwa da dooh yei mynsien ki 5 ngut kiwa chong chnong kani ka chnong wa uwi u Forest Guard ka Assam.
Ya kani ka yalang da pynman ha U Soso Tham Auditorium, Shillong heiwa da wan wow chimbynta da u Montri Rangbha ka jylla, u Conrad K Sanngma, u Symbood Montri Rangbah, u Prestone Tynsong, u Shanbor Shullai, Montri ka Arts & Culture, u Pyniaid Sing Syiem, MLA, Mohendro Rapsang, MLA ki MDC, u Chief Secretary, u D P Wahlang, ka Deputy Commissioner ka East Khasi, ka Isawanda Laloo wa u CVD Diengdoh, Secretary, Home ki dkhot ka Shillong All Faith Forum, ki dkhot ka Khasi Jaiñtia Churches Organization wa kiwi de ki seiñ ka imlang sahlang.
Ya kani ka yalang sñiawlem da khut pynman da ka Synjuk Ki Rangbah Shnong heiwa kiwa klam da pynsñiaw ki yei sñiawsih wei da phah ki leh ya ka khubor pyntngen cha kiwa ha-yung kiwa dooh yei mynsien deiwa kyntu leh ya kiwa boon wow pynneh yei suk i saaiñ ha kam kini ki por.
Da yoh leh yei klam na u Rev. PB Lyngdoh uwa da ong wa ini wa jia toh iwa chyrkhei wei iwa sñiawsih. Da khut u leh yei krehlang ka sorkar ha kini ki por deiwa kyntu leh ya ki seiñ saiñhima wym toh u chim kabu ya ini wa jia tangwa wow krehlang yow ye u jop yeini.
Da kyntu u leh ya ka sorkar Meghalaya wa Assam wow pyntikna wa kiwa dooh yei mynsien wow yoh yei hok yong ki.
Da pynman leh yei suki kiaw wa ar minit kam i dak wow kynmoo warom ya kiwa da khlaad.
