U Lat ka jylla, u C H Vijayashankar ynnin da pynman u ya ka yalang wa kyrpang deiwa emlang kiwa mihkhmat kiwa boon ki niam yow pynyoo yei yatylli neibynta ka Operation Sindoor ka ri.
Neiliang u Lat da khut u ya waroh ki niam wa em hapoh ka jylla yow pynyoo yei mynsien yatylli hapoh ka ri.
Ya kani ka yalang da pynman ha Raj Bhavan, Shillong deiwa chibynta u Nabha Bhattacharya, Vice President ka Meghalaya All Faiths Forum kamjooh u President ka Central Pooja Committee, Shillong, u Rev. Ellizer N Sangma, Pastor ka Garo Baptist Church, u Rev. GPL Gadew na ka Presbyterian Church, Shillong, u Ganesh Dkhar, dkhot ka Seng Khasi, u Sayidullah Nongrum, President ka Meghalaya Muslim Forum, u Dr. Shngain Pyrbot, General Secretary, Seinraij, Shillong, u Father Staibok Warjri na ki Catholic neibynta u Archbishop Victor Lyngdoh, kiwa mihkhmat ka Presbyterian Church ka Khasi wa Jaiñtia Hills, ka Garo Baptist Church, ka Ramakrishna Mission wa ka Archdiocese ka Shillong.
Ha kani ka yalang da emlang leh u Chief Minister, Conrad K. Sangma deilang u Deputy Chief Minister lyngba ka Internet uwa em ha Delhi.
U Lat hawa e yei klam da ong u wa kam ha kini ki por, kiwa yahkhmat niam em ki ka bynta wa emkaam yow wanrah yei yatylli wei wow pynsñsiawthooh wei pyn-jai-jai ya kiwa chong chnong. Da kyntu u leh ya waroh kiwa chong chnong wow burom kylliang kamjooh wow em i mynsien maya ri.
Neiliang u Montri sorkar, u Rakkam A. Sangma da ong u wa ka ri man ko neibynta waroh kiwa chong chnong wei deiwa e i kyrchaan, ka sorkar daw ye ko wow poi cha ka thong deiwa kyntu leh ya ki paidbah wow duwai neibynta ki chipai.
U A.T. Mondal, Montri sorkar, da ong u wa kiwa leh ya ki kaam Terrorist ym emkti ki hapoh ka ri.
U Donald P Wahlang, Chief Secretary da ong u wa ka ri toh kawa toh u wan hakhmat wei da e khublei u leh ya u Lat wa khut pynman u ya kani ka yalang kamjooh ya waroh kiwa wan chimbynta.
Ha kani ka yalang da kynmoo warom ya kitu kiwa da dooh yei mynsien deiwa suki kiaw ar minit.
Discussion about this post