Ka Joint Action Committee (JAC) yong ki tre Truk wa kynthup ya ka All Jaiñtia Cement & Clinker Transporter’s Association wa ka Meghalaya Truckers Union (MTU) da pynman ko ya ka yalang ynne ka sngi ha Mookhep, East Jaiñtia Hills.
Ha kani ka yalang da klam hajrong ki kaam wa sahteiñ ka Committee heiwa ymye de wow khut ya ka yalang kattu la kamwa chi snem wa kiwi ki kaam wa yatoh wa ki tre Truck.
Ha ka yalang da ban joor hajrong i chah pyndik ki Truck yong ki tre jylla ha ki karkhana pynmih khyndawbilat manda poi ha ki kudam wa em ha Assam wei khamtam kam ka Star Cement kawa da thied da ki spah tylli ki Truck kiwa daw pyndooh khih ya ki truck na ka jylla wei wot ha kini ki por wa dadep ya ka kisti da haap su ki tre Truck pyn na kata ki khlem yoh u kit mar.
Hadien ka yalang hawa yaklam wa u President ka AJCCTA, u Balen Thubru da ong u wa da rai wow khut noh ya ka yalang paidbah namo ka General Meeting ka JAC ha ka 9 tarik ha Ynñiawmer hajan ka Toll Gate heipor 11:00 waje i sngi wei da khut ya kani ka yalang toh hadien wa u Chairman wa u Secretary ka JAC ymye de ki wow khut ya ka yalang ka Committee na ki daw wymye u tip.
Neiliang u Monte Ranglong uwa man kam President ka MTU, da ong u wa kattu la kamwa ar snem wa da chah ktah i khih i kreh yong ki nei em ka khlam COVID-19 kattu won manda mut u yoh u sdang khih kamwa jooh, ki karkhana kamka Star Cement da sai ki da kamwa 200 tam tylli ki Truck tæ cheiwon won u khih ki kattu.
Heijooh i por da pyntip ki leh wa ka Jaiñtia Hills Truck Owners Association (JHTOA) ym em bynta de ko ha kani ka JAC.
Da kyntu u leh ya ka sorkar wow wyrai ya ki wei wow kyruiñ cha ki tre Truck leh wow thooh ki laad kammon wow yarap ya ki neibhah ki leh imja ki nei kamai Truck wei lada ka sorkar ymye ko wow yada ya ki ymtip de ki cheiwon u lai ki.
