Jowai: Ka Fit India Movement toh kawi na ki thong yong ka Sorkar Bei wa pynmih ha ka yurim wow pynman ya waroh ki bru wa chong chnong kiwa yoh yei chait i khiah wei dooh i pran wa chait wakhlan, ya kawa da pynbna paidbah da u Prime Minister Narendra Modi ha ka sngi Mulong 29, Naisaphra 2019 ha sor Delhi.
kamtæ hadien i lai luti wa kattu katni bnai yong kani ka Movement, ka Sorkar na Delhi da e hukum kyrpang wa ha kani ka tayaw khatdooh u Khonchonglad u man ka tayaw wa kyrpang yong ka Fit India Movement heiwa ki bru wa chong chnong wa em ha ki thaw waphær u chimkhia ki wow leh burom ya kani ka tayaw yong ka Fit India deiwa pynman ya ki prokram boonjait kiwa kynthup ya ka Sports & Games, Yoga wa kiwi kiwi ki rukom lehke kiwa man chibynta ka luti wow saindur saindar yei chait i khiah wei dooh i pran.
Kat kam ki dak ki chin wa yoh u yoo u sakhi dachem wa ya kani ka Fit India Week hapoh ka West Jaiñtia Hills District da chimkhia wow pynman næ lehburom da ki skur ha ki rukom waphær kawa man leh chibynta ka laad wow khriñ ya ki khynnah wei wanrah yeitæ i sñiaw wa yajan hapyrdi ki khynnah wa kiwa sikai.
Chooh chooh leh da sakhi wa ha kani ka sngi Hat 30 u Khonchonglad ka Art of Living, Jaintia Hills Unit chirup i yakrehlang wa ka Dorbar Chnong Chilliangraij chibynta yong kani ka Fit India Week da khut pynman ki ya ka Yoga Programme kyrpang ya ki khynnah skur wa kiwa sikai kiwa kynthup ya ka Chilliangraij UPS, Dulong UPS, Pohmusiang UPS wa ka Panaliar UPS.
Ha kani ka sngi chwa wow sdang ya ka Yoga da em ka yalang yahkhmat wa tbian hei pynlai u Kamnipaia Challam, Yoga Instructor Art of Living, Jaiñtia Hills Unit hei emlang u waheh Chnong Chilliangraij waheh Damehiwot Pde, wei da yoh leh yei klam e mynsien ya kiwa yachimbynta na u Arun Lanong, General Secretary Dorbar Chnong Chilliangraij katwa u khynroo Rafter Rymbai, Programme Organiser Art of Living, Jaintia Hills Unit da e u ki kyntien khublei.
Discussion about this post