Ka Khasi Students’ Union (KSU) Nongtyngur Unit ha ka 2 tarik uni u bnai deiwa wan yarap lang ki kattu katni ngut ki bru waheh yong ka chnong, da yoh ki u chna pynmiat ya u dieñjri wa em hajan yong ka chnong Nongtyngur khnang yow wanrah yei myntoi wa i miat wei wow pynneh kyrpang ya ki dak wa da prat luti da ki longchwa manchwa deiwa pynwan dur ya uni u dieñ kam ka yingkieñ jri.
Ha katai ka sngi da yahkhmat da u Rostanwell Hadem uwa man u bru waheh ka chnong uwa da prat luti nadooh wa sdang wow sumaar sukhær hi da idæ ya utai u dieñjri khnang wow man kam ka yingkieñ, wei neiliang yong utai u waheh leh da pynsñiaw u yei kmen wa khroo hawa ka seiñ katni da ye ko u chimkti wow pynjanai hi ya katai ka yingkieñ jri.
Ini i leh ka KSU Nongtyngur Unit toh kam chibynta wow chimkti yow pynbha wei pynjanai ya katai ka yingkieñ jri yow yada nei chah pynjæd pynpra wei pynsih dur ki bru ya utai u dieñjri wa em ha rood ka chnong, neibhah ha ki snem wa da lai da em ki bru kiwa da pyrchang wow pam dusmon wei wow noh jhep ha katai ka thaw.
Chooh chooh iwa rap kongsan toh hajrong i thmu wow pynjanai wei wow pynneh pynsah wei sumaar bha ya iwa da booh da ki longchwa manchwa neibynta i yoh myntoi ki paidbah wa lai wa wan, wei sa iwi toh wow wanrah ya ka nongmuna wa bha ya ka pateiñ wa katni wa i myntoi ya kiwa mandien wei leh yow wanrah yei miat hapoh ka chnong ka thaw wa i yajan lok haprydi ka bei rymaw wa ka imlang sahlang.
