Ka National People’s Youth Front (NPYF) ynne ka sngi da pynman ko yaka “U Tirot Sing Syiem Youth Achievement Award” kam chibynta wow kynmoo warom yaka lyngkhooh sngi yap wa 185 U Tirot Sing Syiem haka yalang wa pynman ha Pinewood Hotel, Shillong.
Ha kani ka sngi da emlang u montri rangbah ka jylla kamjooh u National President ka National People’s Party (NPP), u Conrad K. Sangma kam u kongsan deiwa emlang leh u National General Secretary ka NPP, u James K. Sangma, NPYF National Working President u Nickey Nongkhlaw, East Khasi Hills Vice President u Pyniaid Sing Syiem wa kiwi ki wakreh ka Party kamjooh kiwa chah khut sñiawbha.
Ya kani ka U Tirot Sing Syiem Youth Achievement Award da e cha ki 5 ngut kiwa da dep yoh ya ka National Youth Award- u Kitboklang Nongphlang, ka Scaletty Lawriniang, u Pranab Pariat, u Empower Warbah wa u Andreas H. Marwein.
Kani ka e khusnam man ko kam chibynta wow pynchlur ya kini ki khynroo wow pteiñ yei kaam wa bha yong ki yow yahkhmat ki ya kiwi wow bood luti ki.
U kongsan hei klam yong oo da yaroh u yeini wa da leh ka NPYF.
U Conrad da ong u, “U Tirot Sing Syiem ym man u du u khlawait uwa da leh pyrchah yaki phareng wei man u leh kam uwi na ki khlawait wa khroo yong ka ri India, heiwa oo wa ki bru yong oo da yaleh thma ki da ki tiar ki tar wa chna hi ki heiwa da neh kani ka leh pyrchah 4 snem nadooh u 1829 hadooh u 1833. Ynne kam wa kynmoo warom i yaka lyngkhooh sngi yap wa 185 u Tirot Sing, hap kynmoo i leh yei chlur u, wa iwa da e u cha ka jylla yong i. Wei i nongmuna kiwa da pynyoo u toh u em ki ha u nood wei pyrkhat pyrdaiñ ki khynroo ka jylla.”
Da yoh leh yei klam ha kani ka sngi na u James Sangma wa na u Nickey Nongkhlaw uwa da e ya ki ktien pdiang sñiawbha.
