Katkam ka yutip wa tikna wa da yoh ynne ka sngi da ong wa da khang ya ki kattu katni ki yung krehkaam ki pulit ka East Jaiñtia Hills hadien wa em ki pulit kiwa yoh ya u COVID-19 katkam ki Report wa da yoh wei da phah ya waroh ki pulit wow chongkset ki (Quarantine).
Kini ki yung krehkaam wa da haap khang chwa chipor kynthup ki ya ka yung krehkaam u Superintendent of Police, ka Khliehriat Police Station wa ka Women Police Station.
Yeini da pyntikna leh da u Asstt. Inspector General of Police (A), u GK Iangrai wei da pyntip u wa waroh ki pulit wa em ha kini ki yung krehkaam da booh ya ki hapoh ka Medical Observation wei waroh ki kaam yong kini ki ar tylli ki Police Station da kyrriah cha ka Ladrymbai Out-Post.
Ki paidbah yeiwa emkaam ki ha kini ki ar tylli ki Police Station toh u lai ki cha ka Ladrymbai Out-Post.
Katkam wa man hi, ya kini ki yung krehkaam dang pynkhooid ya ki deiwa siat dawai katkam ka kyndon wei hadien wa pynkhooid ya ki daw ye u wai biang.
Da yoh leh ya ka yutip wa tikna wa katkam wa man katni dang yang ya ki Result yong ki pulit na ka RT-PCR kawa man kawi na ki Test kawa ye bha wow pynskem yei chah ktah ha uni u khñiang.
Hawa yaklam wa u SP ka District u Deepak Kr. Palecha da pyntip u wa i kaamram ki pulit ym sangeh i lada man katwa man wei u yaleh ki wow e i chakri wa pura ya ki paidbah.
