Ka VDP ka chnong Nongthymme kawa em ha East Jaiñtia Hills, kawa haap hapoh ka Elaka Rymbai, nadooh ka 02-05-2020 kam chibynta wow yada ya ki doh-um doh-wah, wei neidaw wa dang dep pynlait thymme ya ki symbe dakha kamwa 10,000 tylli ha ka wah wa em ha Khloo Balang, da chim yaka rai kawa eh wow khang pyrchah, ya kini ki kaam ha wah:
- Ym chah wow khwe hapoh ki thaw ka Khloo Balang.
- Ym chah wow thang bom lane Dynamite ha ki wah.
- Ym chah wow tong sasi lane tyngsong cha ki wah.
- Ym toh wow pynyang da ki khnam næ ki jaar cha ki wah.
- Ym chah wow choh da kiwon kiwon ki jait dawai lane ki kynja bih wow pynyap ya ki doh-um.
Ini kynthup leh ya waroh ki thaw wa em hapoh u pood u ang yong ka chnong Nongthymme, nadooh Khlieh Chnong, hadooh Synrang Pom Tkhar wa chadooh Synrang Rasah Ksaw wa waroh ki liar ki lar wa haap ha kani ka wah.
Da ong leh wa neidaw wa da boon snem da em ki bru wa marjan chnong jooh chim kabu ki wow leh ya kitai ki kaam pyrchah aiñ ha waroh tymbud katai ka wah hadooh wa da jan doohjait ki doh-um, kamtæ ka VDP da chim ko yaka rai wa eh wow khang pyrchah, wei wow piatbniah hajrong katai ka wah.
Hajrong i khang pyrchah, da dep booh leh ya ki Signboard ha waroh tymbud katai ka wah wa em hapoh Khloo Balang wei lada chem ya kiwon kiwon wa tyngkheiñ ya kitai ki kyndon wa da kdaw haneiñ, daw chah pynchitom katkam ka aiñ.
