Jowai: Ka Dorbar Chnong Umlyngsha, Elaka Lakadong, EJHD da khang pyrchah ko ya ki baar chnong wow psiah chapoh u pood u ang ka chnong kam chibynta i krehlang wa ka sorkar India kam heini por heiwa u pynlait toh tang kiwa lai luti lyngba u surok RBBJ Road wa surok Umlyngsha-Lakadong.
Ka chnong ym khang ko ya ki bru sorkar kiwa lai wa wan kiwa embynta hei wow yaleh pyrchah ya u khñiang kjut COVID-19
Neiliang ka dorbar chnong da kyrpaad ko ya ki khon yong ka chnong wow ya krehlang ki waka chnong deiwa neh ha ki jar jiar ki yung kam chibynta wow yaleh thma ya uni u khñiang kjut hadooh wa yoh bor naka sorkar wow leh da iwi.
Chooh chooh ka chnong da khang pyrchah ko ya ki baar chnong wa ym hoi de u lai loom lai wah, lai uiñke suwari, lai baam-doh ki cha loom cha wah, lai khwe, lai tong doh um, lai sait that cha wah, ym chah de wow wai waroh ki dukan hapoh chnong, wa kiwi ki kaam wei lada ka chnong chem ko ya kam kini ki bru, daw pynchitom ko ya ki katkam ka aiñ chnong namo deiwa phah kem cha ki bor yong ka aiñ.
Da pyntip wa ka chnong da booh ko leh ya ki Volunteer wow paitbniah ya i lai i wan ki bru deiwa kyrpaad leh ya i krehlang khnang wow jop ya ka thma pyrchah ya uni u khñiang COVID-19.
Discussion about this post