Kam chibynta wow yada nei poor ka khlam COVID-19, ynne ka 21 tarik ki pulit ka Saphai Police Out Post chirup wa kiwa chong chnong yong ki chnong wa marjan nadooh Saphai, Iawthymme, Priang, Iooksi Mooblang, Kyanmynsar, Tongkiad, Pohkseh, Lakadong, Khongshnong, Umdienlien; hei sakhi ki waheh chnong wa ki Social Workers yong ki chnong waphær waphær da lai khang tala ki ya ki lieñ kiwa em harood Kupli nadooh chnong Saphai, Iawtymme wa Priang (Syrpoo).
Ini i khang tala ya ki lieñ man i kam chibynta wow yakrehlang næ i yarap wa ka chnat i chait i khiah wa ka Police Department (Home Department) wow yada nei poor uni u khñiang.
Neiliang u Romit Syngkon uwa man u In-charge ha Saphai Police Outpost da batai che u kammon u yada neini i poor uni u khñiang kamjooh leh lada wym bood ya ka aiñ Meghalaya Epidemic Act wa kiwi kiwi daw pynchitom ya ki katkam ki kyndon ka aiñ.
Kam wow pynkynmoo wa kini ki chnong waroh em ki ha ka thaaiñ khappood wa ka jylla Assam (Dima Hasao District) wei kini ki chnong jooh khih bha ki khamtam ha ka khayi næ lai yaw lai haat lyngba ki lieñ tangwa nadooh wa sdang ka Lockdown da khang yei kamai lieñ wa kini ki mar jan chnong.
Kamtæ na waroh kiwa em ha kani ka bynta wow khang tala kamwa pynkut yei klam, neiliang u Romit Syngkon da kyntu u wow krehlang wa ki bor sorkar wow khang yei poor uni u khñiang neibhah cha chiliang ka Wah Kupli da em boon kiwa yoh ya uni u khñiang COVID-19.
