Ka Deputy Commissioner & District Magistrate, East Khasi Hills District ha ka hukum wa pynmih ha ka 16 tarik uni u bnai da maham ko wa ymhoi wow dai duma cha kiwa em hapoh 18 snem i rta, wow dai hapoh i jngai 100 Yards na ki skur wa kiwi ki thaw puræ wei ki dukan wa dai duma emkaam wow thoh ki “Sale of cigarettes and other tobacco products to a person under the age of eighteen years is strictly prohibited and is a punishable offence”.
Kani ka hukum da pynmih hadien wa yoh ujor na ki paidbah wa em ki dukan wa dai duma cha ki khynnah wei em leh kiwa jan ware wa ki thaw puræ iwa man pyrchah ya ka Section 6 ka Cigarettes and other Tobacco Products Act, 2003 (COTPA) itæ wow khang yei dai ya ki jait duma cha kiwa dang em hapoh 18 snem.
Kani ka aiñ ebor ko ya ki pulit kiwa ymtoh hapoh i kyrdan Sub-Inspector næ u sahep ka State Food lane Drug Administration næ kiwon kiwon ki sahep kiwa ymtoh hapoh i kyrdan Sub-Inspector of Police wow kynreh wei wow kem ya ki duma wa da booh wow dai lada suba u wa man i pyrchah ya ka kyndon Section 6 yong kani ka aiñ wei ye leh u pynchitom ya ki.
Ka DC da ong ko leh wa i dai duma hajan ki thaw puræ man i leh pyrchah ya ka hukum ka Supreme Court of India, wei pynchlur i leh yei wow pynemkaam duma da ki khynnah kiwa ye wow kyrni ha i dih næ baam duma iwa ktah won ya ki hadien habood.
