Khliehriat: U District Magistrate, East Jaiñtia Hill District da pyntip u wa em chiboon i pynemkaam ya ki muna Plastic hapoh ka District wei i noh khalær ya ki leh da ktah i ya ka rymaw, wei khamtam i pynemkaam ya ki Plastic kiwa stang hapoh 40 Micron da joor bha i khamtam ha kini ki sngi.
Da pyntip u leh wa i noh khiar ya ki Plastic da wanrah i yei kset ki dooid, ki liar wa ki um ki wah.
Kamtæ da pynkrehkaam noh ya ka Section 144 Cr.P.C chirup wa ka Rule 4 (b) yong ka Plastic Waste Management Handling Rules, 2011 wow khang wow chna, pynlang ya ki muna Plastic kiwa rben duna ya ka 50 Micron.
Kani ka hukum da khang ko leh u pynemkaam ya i ki Plastic rong khamtam wow song baam, dawai wa ka um.
Chooh chooh da khang leh wow pynemkaam ya ki Recycled Plastic.
Kamtæ ki dukan, kiwa dai madan, ymtoh u saam ki ya ki tiar hapoh Plastic namo wow tymmoh tiar da ki Plastic kiwa da chna katkam ka aiñ wei kiwa em chaap wei kiwa leh pyrchah daw pynchitom ya ki katkam ki kyndon ka aiñ.
Kani ka hukum da man ko kawa krehkaam nadooh wa pynmih ya ka.
