U Sub Divisional Magistrate, Pynursla Civil Sub Division da pynmih hukum u hapoh ka Section 144 CrPC yow khang yei pynyieñ kari khlem da yoh bor nadooh yingkieñ Dawki hadooh ha laad ka chnong Umsyiem ha u sarok NH-40.
Kiwon kiwon kiwa tyngkheiñ ya kani ka hukum daw chah pynchitom hapoh ka kyndon Section 179 ka aiñ Motor Vehicle Act, 1988 wa kiwi de ki kyndon aiñ.
Ka hukum da pynkrehkaam hadien wa da chem wa em ki bru kiwa da booh thaw yow khut ya kiwa chong lieñ ha Umsyiem Boating Point iwa da wanrah kylla yei pynyieñ kari pyrchah ya ka aiñ da ki bru ha ki bynta wa khynnia ka NH-40 ha ini i thaw.
Chooh chooh da ong wa ini i myllien da wanrah ko yei sahkut ki kari khamtam ha kini ki por wa boon kiwa uiñke suwari iwa da ktah bha ya ki paidbah kiwa lai wa wan wei kiwa pynemkaam ya kani ka sarok.
Kani ka hukum toh kawa krehkaam chisyndon.
