Hadien wa ka Election Commission of India ynne da pynbna ko ya ki tarik pynman Election ha Meghalaya heiwa ka sngi thap Vote u man ko ha ka 27-02-23 wei da sdang leh u krehkaam ka Model Code of Conduct kamjooh kiwi de ki kyndon wa da booh da ka Election Commission.
Neiliang u District Magistrate kamjooh u District Election Officer ka East Khasi Hills da pyntip u wa ka Election Commission kwah ko wow pyntikna wa kiwa thap Vote toh u yoh ki wow pynemkaam yei hok ki deiwa laitlooid khlem tieñ kamjooh khlem chah thied.
Kamtæ yow lait na ini wei wow khang ya ki bru wow rah poisa ki chiboon yow lait u mih iwon iwon i pynthut ya ka Election, da pynkrehkaam ya ka Section 144 CrPC yow khang ya kiwon kiwon ki bru, ki seiñ wow rah ki palat T. 50,000 ka poisa hapoh ka East Khasi Hills District hadooh wa kut ka Election.
Da khang leh wow thoh u liar ha ki chram, u biah Poster, u wah seh ya kiwon kiwon ki dak pynriam Election nadooh ki dur yong ki kyrtong, ki Hoarding, ki Banner, ki Poster wa kiwi kiwi ha kiwon kiwon ki thaw paidbah.
Da khang ya kiwon kiwon ki Political Party wow booh banner ha ki luti syngkieñ.
Lada leh ya kiwon kini waroh ha ki thaw yong ki bru samen, emkaam wow yoh bor chwa na ki deiwa thoh dei thoh.
Da khang wow pynman ya kiwon kiwon ki yalang Election khlem da yoh bor na u District Magistrate wei ym toh wow pynemkaam ya ki tanghæng nadooh 10:00 waje i miet hadooh 6:00 waje i step wei lada pynemkaam khlem da yoh bor, daw kem ya ki tiar ki tar.
Kamjooh leh da khang wow pynman ya ki lai paidbah khlem da yoh bor hadooh ka kut ka Election.
