Kam chibynta wow yada nei poor ka khlam COVID-19 iwa da joor bha katni, ka District Magistrate, East Khasi Hills District, Shillong da pynmih hukum ko ynne ka sngi hapoh ka Section 144 Cr.P.C. deilang wa ka Regulation 3 ka Meghalaya Epidemic Diseases, COVID-19 Regulations, 2020 yow khang yei yalang wei psiah ki bru cha Golflink man-ka-sngi Bibar hadooh wa pynmih hukum da kamwi.
Kani ka hukum da pynmih neidaw wa ku kiwa dang yoh COVID-19 ha East Khasi Hills District, heiwa kiwa boon kiwa dang yoh toh kiwa liwan, kiwa yachem pateiñ wa kiwa yoh ya uni u khñiang hapoh Shillong wa ki chnong wa em chajan, heiwa da khang leh ya waroh ki thaw uiñke suwari ha East Khasi Hills District da ka sorkar jylla nadooh ka 23 tarik.
Kani ka hukum da pynmih neidaw ka Golflink man ko kawa ka-it bha kiwa wanke cha sor Shillong, wei ka District Magistrate da pyntip ko leh wa da yoh yutip ko wa em boon bha ki bru kiwa wan cha ini i thaw deiwa ym em bood ya ka Social Distancing i deiñ Mask khamtam ha ki sngi wa kut tayaw heiwa kiwa boon ki thaw wa poor u khñiang toh ha ki thaw wa em boon ki bru.
Ya kiwa leh pyrchah daw pynchitom ya ki katkam ka aiñ.
