U District Magistrate ka East Jaiñtia Hills da pyntip u wa kam chibynta wow pynkrehkaam ya ka Model Code of Conduct nadooh wa pynbna ka Election Commission of India ya ki tarik pynman Election hapoh Meghalaya khamtam hawa yatoh wa i biah Poster, i booh lama, i booh Banner wa kiwi kiwi ha ki thaw ki bru samen, ki thaw paidbah wa ki thaw ka sorkar.
Da pyntip wa kiwon kiwon ki pynriam yong Election nadooh i thoh i liar ha ki chram ki yung krehkaam sorkar, ki sarok sorkar, ki yung sorkar toh kiwa da khang wow leh wa kynthup leh yei booh lama, i biah Poster, i pynyieñ ya ki dur ki dar ka Party lane ki kyrtong.
Heiyatoh wa ki thaw yong ki bru samen ya kini ki jooh ki pynriam Election ym toh wow leh khlem da yoh bor wei dei mon sñiawbha ki tre yung, tre thaw wei toh u yoh leh dei thoh yei e bor wei ya kani toh u li e cha u Returning Officer hapoh 3 sngi chwa wow booh ya ki lama, ki Banner wa kiwi de kam kini ki jait.
Iwon iwon iwa da thoh, iwa da booh da pynyoo pyrthai kam chibynta ka Election ym toh u pynmong yei sñiaw ki paidbah wei lada chem wa em kam ini daw chah pynchitom katkam ka Section 171H ka IPC.
Heiyatoh won wa ki kari kamai, ym chah wow booh lama, u biah Sticker wa kiwi kiwi lait noh wa da chimwai ya kani ka kari neibynta wow lai yalap Election deiwa yoh bor chwa na u District Election Officer/Returning Officer wei yei e bor toh u biah ha ka yit ka kari.
Heiyatoh won wa ki kari ki bru samen wow booh lama, u biah Sticker toh iwa chong hei mon u tre tangwa ym toh won u pynthut ini ya kiwi kiwa pynemkaam ya ka sarok.
Da khang leh wow rah ya kiwon kiwon ki tiar yasiat, ki tiar tympdung dei thmu wow pynthut yei suk i saaiñ.
