Heiyatoh wei sdang noh yei puræ puthi ha National Law University ka Meghalaya da pyntip wa da em ka BA LLB, BS LLB, BBA LLB (waroh kiwa 5 snem Dual Degree Law Programmes ya kiwa da pyndep ya ka Class 12) waka Post Graduate Programme in Law [LL.M (Major in Corporate Law)] kiwa daw sdang ha u Naiynñiaw 2023 kam ka First Batch.
Neiliang u Prof. Indrajit Dube, Vice Chancellor, National Law University da pyntip u wa da wai ya ka Online Application nadooh ka 21-04-23 wei daw kut ko ha ka 21-05-23 wei ka Admission Test daw pynman ha ka 28-05-23. Katwa ya ka Result won daw pynmih ha ka 09-06-23 wei ki Class daw sdang ki ha ka 10-07-23.
Da pyntip u leh wa neibynta ka Undergraduate Course daw chim 60 ngut kiwa lai puræ wei mar 20 ngut ha ka BA LLB, BS LLB wa BBA LLB Honours wei daw em chim 10 ngut kiwa lai puræ Post-Graduate.
Chooh chooh da ong u wa ka bai lai puræ leh neibynta ki Undergraduate wa Postgraduate toh kiwa duna dor hawa nujor wa kiwi ki College, ki University ki bru samen kamjooh ki National University.
Da khana u leh wa 50% toh da booh ya kiwa chong chnong ka Meghalaya, kamtæ da khut ya kiwa kwah u man Lawyer wow chim kabu yeini wow wan lai puræ.
Kitu kiwa kwah wow yaleh ye ki wow lai ha ka Website ka University ka www.nlumeg.ac.in yow tip bniah wei kani ka University u krehkaam ko na Mayurbhanj Complex, Nongthymmai, Shillong.
Deilang wa u Prof. Indrajit Dube, Vice Chancellor, National Law University, Meghalaya da emlang u Pravin Bakshi, Commissioner and Secretary, Education Department wa u E Kharumnuid, Registrar, High Court of Meghalaya wei ya kani ka yachem lang wa kiwa thoh khubor da pynman ha Meghalaya State Judicial Academy, Tapovan Building, Bivar Road, Shillong.
