I yakhih deiwa pynuiñ ya ki Truck kit Cement wa Clinker wa wan na ki Company pynmih khyndaw bilat ka ri-loom Jaiñtia wa da pynman da ka seiñ Meghalaya Commercial Truck Owner and Driver’s Association (MCTODA), Jaiñtia Unit ha u sarok Jowai Bypaas ha Mihmyntdu-Khliehtyrchi, ynne ka sngi da poi ko cha ka sngi wa ar.
Neiliang u Ardonki Talang kam uwi na ki dkhot yong kani ka seiñ hawa e yei klam ong u, ka yakhih yong ki hadooh ynne ka sngi wa ar dang lai bait ko deiwa yaleh u bood ryntih ya ki kyndon yong ki bor sorkar, tangwa hapyrdi i yatylli yong ki kam ki tre Truck wa kiwa yah Truck, neiliang ki Company Cement won da sdang ki u pynemkaam da ki bru samen næ ki bru khwan myntoi kiwa da pyrchang u tympiah tympra yei yatylli yong ki kam ka seiñ.
Ong haroh u wa ki Company Cement nadooh nachwa da thooh laad ki u tympiah ya ka Association ha ri-loom Jaiñtia du yow yoh khih ki kari yong ki hi, neibhah kamwa man katni kawi kawi ka Company da thied kari ki da 300-400 tylli wei ini da wanrah ko i doohnong ya kiwa booh kari kiwa yah kari kiwa man ki tre jylla.
Chooh chooh khana u wa kam ka seiñ hi da rai ko u yieñ bait, u yakhun deiwa rai kut wow yaichah wei kreh chitom deiwa khut i kyrchaan ya kiwi won ki paralok wa im-ja nei kaam kit kaam bah.
Neitæ kyrpaad haroh ki ya kiwa mihkhmat paidbah ka ri-loom Jaiñtia wow pyrkhatlang ki yei kamai yong ki yow yoh ki i dor bai kit katkam i dor sorkar khnang yow yoh kamailang wei ya imlang.
Discussion about this post