Jowai : Ka office u District Election Officer ka West Jaiñtia Hills yow sñiawthooh ki khynnah puræ ka Thomas Jones Synod College chaphang kammon wow yoh ya ka Epic Card yong ki, ynnin ka 22 tarik da pynman ki ya awareness programme hapoh ka Systematic Voters’ Education and Electoral Participation (SVEEP) kawa leh ha waroh ka wi ka ri yow pynchlur ya kiwa da biang rta yow wan ki cha khmat yow thap pyrtuid ki kam kiwa da yoh vote.
U B. Kharshandi, MCS (EAC) ong u wa ya ki khynnah wa da dap 18 snem da yoh ki i hok wow thap vote kamjooh de ye ki u yoh ya ka Epic tangwa boon ki khynnah khynroo wa khyllood won jooh kwah epic ki yow yoh SIM card wa kiwi kiwi tangwa ym em won u pyrkhat ya i bor ka Epic yong ki ha i por election.
Da ong u leh wa kiwon kiwon ki wa daw dap 18 snem hadooh ka 1 tarik January 2017 ye ki u yaleh yow yoh Epic tangwa lada dap ki 18 snem na ka 2 tarik u January 2017 cha neiñ haap yang chwa ki. Ya ka 1 tarik u January leh da tip kam ka ‘Qualifying Date’.
Kamjooh neiliang ka office yong oo kwah ki wa manda pyllait ya ka electoral roll ym hoi u em iyi iyi leh i bakla kam hei pyrtuid, thaw sah kamjooh wow pyndooh noh ya i pyrtuid kiwa da khlaad.
Ka college Thomas Jones leh da em ko soo ngut ki Campus Ambassador kiwa da jied ya ki yow yarap ki ya ki khynnah wa ym pu em Epic hadooh wow li booh ya ki form cha ka Office u Election Officer.
Ha kani ka sngi da em hadooh 18 ngut ki khynnah puræ Class XII wa wan pyndap ya ki form yow yoh Epic ki, kiwa daw saam cha ki ha ka National Voter’s Day.
Discussion about this post